زکوٰۃ کٹوتی کا دن، ملک بھر کے بینک آج عوامی لین دین کیلئے بند

اسلام آباد: پاکستان بھر کے بینک آج زکوٰۃ کٹوتی کیلئے بند رہیں گے، اس دوران عوام بینکوں کے ذریعے رقوم کی ترسیل اور چیک کیش کرانے سمیت دیگر لین دین نہیں کرسکیں گے۔

تفصیلات کے مطابق اسٹیٹ بینک آف پاکستان نے زکوٰۃ کٹوتی کا باضابطہ اعلامیہ جاری کردیا جس کے تحت کوئی بینک عوامی لین دین نہیں کرے گا۔ ملک بھر کے بینک عوام کو سہولیات مہیا نہ کرتے ہوئے زکوٰۃ کٹوتی پر اپنی توجہ مرکوز رکھیں گے۔

یہ بھی پڑھیں:

رمضان کی آمد،پھل، دالیں، بیسن، چنے اور مصالحے مزید مہنگے، شہری پریشان

ملک بھر کے سیونگ، نفع نقصان اور دیگر منافع بخش اکاؤنٹس سے آج زکوٰۃ کی رقم کاٹ لی جائے گی۔ رواں برس حکومت نے 88 ہزار 927 روپے کے حامل شہریوں کو صاحبِ نصاب قرار دیا تھا۔ واضح رہے کہ صاحبِ نصاب افراد پر زکوٰۃ فرض ہوتی ہے۔

غیر مسلم افراد اورنصاب سے کم رقم رکھنے والے اکاؤنٹس سے زکوٰۃ نہیں کاٹی جائے گی۔ ملک بھر کے بینکس میں صاحبِ نصاب افراد کے اکاؤنٹس میں سے زکوٰۃ کی 2.5 فیصد رقم کاٹی جائے گی جس کیلئے قواعد و ضوابط مقرر کردئیے گئے۔

خیال رہے کہ زکوٰۃ اسلام کے 5 بنیادی ستونوں میں سے ایک ہے جس کی فرضیت پر احادیث اور قرآنی آیات سے استدلال کیا جاسکتا ہے۔ علمائے کرام کا کہنا ہے کہ صاحبِ نصاب افراد پر زکوٰۃ دینا فرض ہے جو مستحق افراد کا حق ہوا کرتا ہے۔