آزادی مارچ لاہورسےبذریعہ گجرانوالہ اسلام آبادکی جانب رواں دواں

جمعیت علمائے اسلام (ف) کا حکومت مخالف ’آزادی مارچ‘ رہنماؤں اور کارکنان کی بڑی تعداد کے ہمراہ لاہور سے بذریعہ گوجرانوالہ اسلام آباد کی جانب رواں دواں ہے۔

مولانا فضل الرحمان کی قیادت میں کراچی سے شروع ہونے والا جے یو آئی (ف) کا آزادی مارچ گزشتہ شب لاہور پہنچا تھا جہاں ٹھوکر نیاز بیگ پر مارچ کے شرکا کا استقبال کیا گیا اور آتش بازی بھی کی گئی تھی۔

مارچ کے شرکاء نے رات مینار پاکستان کے سبزہ زار میں گزاری جب کہ مولانا فضل الرحمان نے وحدت روڈ پر قیام کیا، اس موقع پر لاہور کے یتیم خانہ چوک پر جے یو آئی (ف) کے سربراہ مولانا فضل الرحمٰن نے شرکا سے مختصر خطاب بھی کیا تھا۔

مینار پاکستان پر خطاب میں سربراہ جے یو آئی مولانا فضل الرحمان کا کہنا تھا کہ آزادی مارچ حکمرانوں کے خلاف ہے، قانون اور آئین کے دائرے میں رہ کر حکومت کو گھر بھجوائیں گے۔

مولانا فضل الرحمٰن کا مزید کہنا تھا کہ موجودہ حکمرانوں کو حکومت کرنے کا کوئی حق نہیں، ہمارے اسلام آباد پہنچنے سے پہلے حکمران استعفی دیں، حکمرانوں عوام کو ان کے ووٹ کی امانت واپس کردو۔

خطاب میں مولانا فضل الرحمٰن کا کہنا تھا کہ اب بھی مہلت ہے کہ عمران خان استعفٰی دیں اور بھیانک انجام سے بچیں، کراچی سے اسلام آباد تک قوم یکسو ہے کہ عمران خان مستعفی ہوں۔

مولانا فضل الرحمان نے کہا کہ گزشتہ 9 ماہ میں 15 ملین مارچ کیے جو پرامن تھے، ہمارے کارکن ملک کے امن کو سب پر مقدم رکھتا ہے، یہ قافلہ کوئٹہ اور کراچی سے چلا تھا، راستے میں کسی شہری کو خراش تک نہیں آئی۔

اس آزادی مارچ کو پاکستان کے ہر شہری کی حمایت کی ہے، ہمارا مطالبہ اب بھی یہی ہے، 25 جولائی کے انتخابات ہوئے ان میں بدترین دھاندلی ہوئی، اس کے نتائج قبول نہیں کرتے، ہم نے پہلے ہی دن سے حکومت کو تسلیم نہیں کیا، اس کے خلاف مارچ خروج نہیں ہے۔

واضح رہے کہ جے یو آئی (ف) کے سربراہ نے 25 اگست کو اعلان کیا تھا کہ ان کی جماعت اسلام آباد کی جانب لانگ مارچ کا ارادہ رکھتی ہے، جس کا مقصد اکتوبر میں ‘جعلی حکومت کو گھر بھیجنا ہے۔