گوگل نیوز پر ہمیں فالو کریںپاکستان کے خلاف آسٹریلوی اوپنرز نے آئی سی سی کرکٹ ورلڈکپ کے اٹھارہویں میچ میں سب سے بڑی شراکت داری کا ریکارڈ بنا دیا۔
قومی ٹیم کے کپتان بابر اعظم نے بنگلورو کے چنا سوامی اسٹیڈیم میں ٹاس جیت کر آسٹریلیا کو پہلے بیٹنگ کی دعوت دی جس کے بعد آسٹریلیا کی جانب سے اننگز کا آغاز مچل مارش اور ڈیوڈ وارنر نے کیا۔
مچل مارش اور ڈیوڈ وارنر نے اننگز کے آغاز سے ہی پاکستانی بولرز کی جم کر دھلائی کی اور اپنی ٹیم کو شاندار آغاز فراہم کیا۔دونوں اوپنرز نے پاکستانی بولرز کی ایک نہ چلنے دی۔
ڈیوڈ وارنر اور مارش کے درمیان پہلی وکٹ پر 259 رنز کی شراکت داری قائم ہوئی جو کہ پاکستان کے خلاف ورلڈکپ میں کسی بھی وکٹ پر سب سے بڑی شراکت داری ہے۔
پاکستان کے خلاف پہلی مرتبہ کسی ٹیم نے ورلڈ کپ میں 200 رنز کی شراکت بنائی ہے۔اس سے قبل ورلڈ کپ میں کسی ٹیم نے 200رنز کی شراکت قائم نہیں کی۔
واضح رہے کہ ویسٹ انڈیز کے برائن لارا اور ڈیسمونڈ ہائنس نے 1992 میں پاکستان کے خلاف 175 رنز کی شراکت قائم کی تھی۔
