ڈالر کی بلند پرواز کا سلسلہ جاری، انٹربینک میں ڈالر مزید مہنگا ہوگیا

کراچی: ڈالر کی قدر میں اضافہ اور روپے کی قدر میں مسلسل کمی کا سلسلہ جاری ہے۔

تفصیلات کے مطابق آج کاروباری دن کی ابتداء میں ہی انٹربینک میں امریکی ڈالر نے اونچی اڑان بھری، امریکی ڈالر 1 روپے 25 پیسے مہنگا ہو گیا، جس کے بعد ڈالر 210 روپے کی ریکارڈ سطح پر پہنچ گیا ہے۔

دوسری جانب اوپن مارکیٹ میں امریکی ڈالر پہلی بار 213 روپے کی ریکارڈ سطح پر موجود ہے۔

واضح رہے کہ انٹر بینک میں ڈالر جمعہ کو 208 روپے 75 پیسے پر بند ہوا تھا۔

یہ بھی پڑھیں:

حکومت نے چینی درآمد کرنے کا فیصلہ واپس لے لیا

خیال رہے کہ خسارے اور زرِ مبادلہ کے کم ہوتے ہوئے ذخائر کی وجہ سے پاکستان میں روپے کی قدر میں بھی مسلسل کمی کا سلسلہ جاری ہے اورڈالر میں اضافے کے باعث ملکی قرضوں میں اضافہ ہورہا ہے۔

معاشی ماہرین کے مطابق کرنسی کی قدر میں غیر معمولی اتار چڑھاؤ سے برآمد کنندگان اور درآمد کنندگان کو شدید پریشانی کا سامنا ہے جب کہ بیرونی سرمایہ کاروں پر بھی اسکے منفی اثرات مرتب ہورہے ہیں۔