گوگل نیوز پر ہمیں فالو کریںلاہور کے فورٹریس اسٹیڈیم میں منعقد ہونے والی ہارس اینڈ کیٹل شو کی اختتامی تقریب میں پنجابی ثقافت کے رنگ بھرپور انداز میں نمایاں ہوئے۔
یہ شاندار تقریب پنجاب کی وزیر اعلیٰ مریم نواز کی میزبانی میں منعقد ہوئی، جس میں روایتی رقص، پریڈ اور موسیقی کے رنگ بکھیرے گئے۔
آرمی چیف جنرل سید عاصم منیر خصوصی مہمان کے طور پر تقریب میں شریک ہوئے، جہاں ان کی آمد پر رینجرز کے دستے نے سلامی پیش کی۔
تقریب میں پنجاب حکومت کے اعلیٰ عہدیدار بھی شریک ہوئے، جن میں سینئر وزیر مریم اورنگزیب، وزیر ہاؤسنگ بلال یاسین، وزیر بلدیات ذیشان رفیق اور وزیر قانون صہیب بھرت شامل تھے۔ اس کے علاوہ بڑی تعداد میں شہریوں نے بھی اس رنگا رنگ میلے میں شرکت کی۔
تقریب میں مختلف روایتی کھیلوں اور ثقافتی سرگرمیوں کا انعقاد کیا گیا جس میں پنجاب کے بھرپور ثقافتی ورثے کو اجاگر کیا گیا۔
نیزہ بازی کا شاندار مظاہرہ، پنجاب گرین اور پنجاب وائٹ ٹیموں کے درمیان دلچسپ کبڈی میچ، اور ملک کے مختلف شہروں سے لائے گئے خوبصورت سجائے گئے اونٹوں اور مویشیوں کی پریڈ شامل تھی۔
ڈھول کی تھاپ پر رقص کرتے گھوڑے شائقین کی توجہ کا مرکز بنے جبکہ علاقائی لوک رقص نے پاکستان کی متنوع ثقافت کو نمایاں کیا۔
تقریب میں شامل خصوصی فلوٹس نے “اسموگ سے پاک پنجاب” کے پیغام کو اجاگر کیا، جس کا مقصد صوبے میں ماحولیاتی آگاہی اور پائیدار طرزِ زندگی کو فروغ دینا تھا۔
تقریب کے اختتام پر معروف گلوکار راحت فتح علی خان اور عارف لوہار نے اپنی دلکش موسیقی سے شائقین کو محظوظ کیا۔ ان کی شاندار پرفارمنس نے اس عظیم الشان میلے کے اختتام کو یادگار بنا دیا۔
