عمران خان کو بڑا دھچکا، علیم خان گروپ کا اپوزیشن کا ساتھ دینے کا فیصلہ

لاہور:پی ٹی آئی کے ناراض رہنما علیم خان کے گروپ نے ق لیگ کو وزارتِ اعلیٰ کا ووٹ دینے سے انکار کرتے ہوئے اپوزیشن کا ساتھ دینے کا فیصلہ کیا ہے۔ 

تفصیلات کے مطابق وزیر اعلیٰ عثمان بزدار اپنے عہدے سے مستعفی ہوچکے ہیں۔ وفاقی حکومت اسپیکر پنجاب اسمبلی چوہدری پرویز الٰہی کو وزارتِ اعلیٰ دینے کا وعدہ کرچکی ہے تاہم ترجمان علیم خان گروپ کا کہنا ہے کہ ہم اپوزیشن کا غیر مشروط ساتھ دینگے۔

یہ بھی پڑھیں:

وفاقی کابینہ کا ہنگامی اجلاس آج طلب، خالد مقبول کی شرکت سے معذرت

پنجاب اسمبلی میں متعدد اراکینِ اسمبلی پر مشتمل علیم خان گروپ کا کہنا ہے کہ ہم کوئی سودے بازی نہیں کریں گے۔ اگر نیا پاکستان پرویز الٰہی بنائیں گے تو پی ٹی آئی بنانے کی کیا ضرورت تھی؟ پی ٹی آئی کے ہر مخلص کارکن کو پرویز الٰہی کی نامزدگی پر اعتراض ہے۔

ترجمان علیم خان گروپ خالد محمود کا کہنا ہے کہ عمران خان جن القابات سے پرویز الٰہی کو پکارا کرتے تھے، ہم دہرا بھی نہیں سکتے۔ وفاقی حکومت نے پہلے 4سال ایک بے ایمان ، نکمے عثمان بزدار کو مسلط رکھا، اب پرویز الٰہی کو نامزد کردیا ہے۔

خالد محمود نے کہا کہ جہانگیر خان ترین کی پی ٹی آئی کیلئے بہت قربانیاں ہیں۔ ان کی صحت یابی کیلئے دعا گو ہیں۔ واضح رہے کہ ایم کیو ایم کی رابطہ کمیٹی اپوزیشن اتحاد کی حمایت کی توثیق کرچکی ہے جس سے وفاقی حکومت کی مشکلات میں اضافہ ہوگیا۔