ہر سال بجٹ میں سب سے زیادہ بوجھ غریب آدمی پر ڈالا جاتا ہے۔ آغا رفیع اللہ

اسلام آباد: پیپلز پارٹی کے رکنِ قومی اسمبلی سیّد آغا رفیع اللہ نے کہا ہے کہ ہر سال بجٹ میں سب سے زیادہ بوجھ غریب آدمی پر ڈالا جاتا ہے۔ بجٹ اچھاہے یا برا، اس کا فیصلہ قوم کرے گی۔

تفصیلات کے مطابق آج قومی اسمبلی اجلاس کے دوران اپنے خیالات کا اظہار کرتے ہوئے پیپلز پارٹی رکن آغا رفیع اللہ نے کہا کہ بجٹ اچھا ہے یا برا، اس کا فیصلہ عوام کریں گے۔ ہر سال بجٹ میں سب سے زیادہ بوجھ غریبوں پر ہی ڈالا جاتا ہے۔ہر شخص کہہ رہا ہے کہ مشکل حالات میں حکومت لینے کی کیا ضرورت تھی؟

یہ بھی پڑھیں: 

وزیر اعظم کا مری کا دورہ، ترقیاتی منصوبوں پر بریفنگ 

قومی اسمبلی میں اظہارِ خیال کے دوران سیّد آغا رفیع اللہ نے کہا کہ ملک آئینی، معاشی اور خارجی بحرانوں کا شکار تھا۔ سابق وزیر اعظم اور چیئرمین پی ٹی آئی عمران خان نے پارلیمنٹ کو اکھاڑہ بنایا ہوا تھا۔ وہ اپوزیشن سے ہاتھ بھی ملانے کو تیار نہیں تھے۔ وزیر اعظم شہباز شریف پاکستان کو بہتری کی طرف لے جانا چاہتے ہیں۔

رکنِ قومی اسمبلی آغا رفیع اللہ نے کہا کہ ہم چاہتے ہیں کہ پی ٹی آئی ایوان میں آ کر بہتر انداز میں اپوزیشن کرے۔ اراکین آپس میں نفرتیں کم کریں۔ اگر آج عمران خان قومی اسمبلی میں موجود ہوتے تو بجٹ پر بہتر تجاویز دیتے۔ ہماری خواہش ہے کہ پی ٹی آئی بھی ایوان میں آئے تاکہ ملک کے تمام لوگوں کی نمائندگی ہوسکے۔

پیپلز پارٹی رکن نے کہا کہ پی ٹی آئی کے اراکین تنخواہیں، مراعات اور گاڑیاں تو استعمال کر رہے ہیں، لیکن قومی اسمبلی میں عوام کی نمائندگی نہیں کر رہے۔ عمران خان کی سلیکٹیڈ حکومت نے ساڑھے 8 لاکھ لوگوں کو بے نظیر انکم سپورٹ پروگرام سے نکال دیا۔ نکالے ہوئے خاندانوں کو دوبارہ شامل کر رہے ہیں۔