گوگل نیوز پر ہمیں فالو کریںاسپیکر بلوچستان اسمبلی میر عبدالقدوس بزنجو نے وزیر اعلیٰ جام کمال، وزیرخزانہ ظہوربلیدی اور سینیٹر سرفراز بگٹی کے خلاف تحاریک استحقاق جمع کرادی ہیں۔
اسپیکر بلوچستان اسمبلی عبدالقدوس بزنجو نے تین علیحدہ تحاریک بلوچستان اسمبلی میں جمع کرائیں جس میں کہا گیا ہے کہ وزیراعلیٰ جام کمال کا بیان تھا کہ میں ایک جذباتی شخص ہوں، وزیراعلیٰ نے میرے خلاف غیرمہذب اورغیرپارلیمانی الفاظ استعمال کیے۔
انہوں نے کہا کہ بحیثیت اسپیکر مجھے اظہار رائے کی مکمل آزادی حاصل ہے،تحریک استحقاق کو متعلقہ کمیٹی کے حوالے کیا جائے کیونکہ وزیر اعلیٰ کے اس بیان سے نہ صرف میرا بلکہ پورے ایوان کا استحقاق مجروح ہوا ہے۔
عبدالقدوس بزنجو کا اپنی تحریک میں مزید کہنا تھا کہ وزیرخزانہ میرظہوربلیدی نے بیان دیاکہ میں بلوچستان کی سیاست میں غیراہم ہوگیا ہوںاس کے علاوہ بھی انہوں نےغیرپارلیمانی اورغیرمہذب الفاظ استعمال کیے۔
عبدالقدوس بزنجونے کہا کہ سرفرازبگٹی کاایک چینل پرکہناتھاکہ میں بلوچستان عوامی پارٹی کی کورکمیٹی کا رکن ہوں، وزیر اعلیٰ، وزیرخزانہ اور سرفرازبگٹی کے بیانات سے میرا استحقاق مجروح ہوا لہٰذا اس معاملے کو استحقاق کمیٹی کے حوالے کیا جائے۔
بعد ازاں میڈیا سے گفتگو کرتے ہوئے اسپیکر عبدالقدوس بزنجو کاکہناتھا کہ بلوچستان میں اس سے بدتر حکومت پہلے کبھی نہیں آئی، جام کمال پارٹی کے مالک نہیں ہیں بلکہ میری طرح وہ بھی ایک ممبر ہیں جو پارٹی چلانے کے قابل نہیں وہ صوبے کو کیسے چلائے گا۔
یہ بھی پڑھیں: فردوس عاشق اعوان نے بدعنوانی کے متعلق ٹرانسپیرنسی انٹرنیشنل کی رپورٹ مسترد کردی
