ایف آئی اے کی کارروائی، وزیراعظم ہاؤس کا جعلی سیکشن آفیسر گرفتار

ایف آئی اے اینٹی کرپشن سرکل اسلام آباد نے وزیراعظم ہاؤس کا جعلی سیکشن آفیسر بن کر لوگوں کو لوٹنے والا خودساختہ نیشنل پیس کونسل فار انٹر فیتھ ہارمونی پاکستان کے چیئرمین مصطفیٰ انصاری کو گرفتار کر لیا ہے۔

ملزم لوگوں سے لاکھوں روپے کے عوض ذاتی پرائیویٹ گاڑیوں پر سرکاری گرین نمبر استعمال کرنے کا این او سی وزیراعظم ہاؤس کے جعلی لیٹر پیڈ پر بطور سیکشن افسر بن کر پیسوں کے عوض فروخت کر رہا تھا۔

ملزم خود ساختہ تنظیم کو گورنمنٹ آف پاکستان کی منظور شدہ تنظیم بتا کر ممبرشپ اور مختلف اضلاع میں نیشنل پیس کونسل فار انٹر فیتھ ہارمونی پاکستان کے عہدے داران بنانے کا جھانسہ دے کر لاکھوں روپے بٹور چکا ہے۔

ایف آئی اے نے ملزم کی نشاندہی پر کارروائی کرتے ہوئے ہوئے ملزم کے نجی دفتر واقع ایف الیون سیکٹر اسلام آباد سے وزیراعظم ہاؤس کے جعلی لیٹر پیڈ، مختلف اتھارٹی لیٹر و جعلی سرکاری دستاویزات مواہیر لیٹرز پیڈ کمپیوٹرز موبائل فونز جعلی پارٹی کی رسیدیں پارٹی لیٹر پیڈ اور بڑی تعداد میں نیشنل پیس کونسل کے مختلف لوگوں کے نام پر جاری شدہ کارڈز اور مختلف شخصیات کے ساتھ تصاویر بھی برآمد کر لی ہیں۔

یہ بھی پڑھیں 

ایف آئی اے اور کمرشل بینک سرکل کی کارروائی، حوالہ ہندی میں ملوث 9 ملزمان گرفتار

گرفتاری کا ریکارڈ نہ چالان،پولیس محمودآباد سے کارڈیلر کو اغواء کرکے لے گئی

ملزم سیاسی شخصیات کے ساتھ تصاویر کو استعمال کرتے ہوئے لوگوں کو سرکاری نوکریوں کا جھانسہ دے رہا تھا۔ ملزم نے جعل سازی کرتے ہوئے نیشنل پیس کونسل کی جعلی سرکاری ویب سائٹ بھی بنا رکھی تھی جس سے پی ٹی اے نے بلاک کر دیا ہے۔

ملزم نے ایک سیاسی پارٹی نیشنل پیس کونسل پارٹی 2015 میں الیکشن کمیشن کے ساتھ رجسٹر کروا رکھی تھی جو کہ 2017 میں کینسل ہو گئی جس کو ملزم نے دوبارہ بحال کروایا تھا۔ اور گزشتہ تین سالوں کے فنانشل گوشوارے جمع نہ کروانے پر ملزم کو ای سی پی کی طرف سے نوٹس جاری ہوچکا ہے۔

ایف آئی حکام کے مطابق ملزم کا تعلق فیصل آباد سے ہے اور ملزم خیبر پختونخوا کے شہریوں کو سافٹ ٹارگٹ سمجھ کر لوٹ رہا تھا۔ ملزم نے ابتدائی تفتیش میں بتایا کہ اس نے پارٹی ممبر شپ کے نام پر تین لاکھ سے زیادہ لوگوں سے ممبر شپ فیس کے نام پر رقم اکٹھی کی ہے ایف آئی اے نے ملزم کا مجاز عدالت سے چار روزہ جسمانی ریمانڈ حاصل کرکے مزید تفتیش شروع کر دی ہے