گوگل نیوز پر ہمیں فالو کریںاسلام آباد: وزیراعظم عمران خان نے بین الاقوامی برادری پر زور دیتے ہوئے کہا ہے کہ وہ افغانستان میں پائیدار امن کے لیے اپنا بھرپور کردار ادا کرے۔
ان خیالات کا اظہار وزیراعظم عمران خان نے جمعہ کے روز پی ایم ہاؤس میں ڈنمارک کے وزیر خارجہ جیپی کوفیڈ سے ملاقات کے دوران کیا۔ عمران خان نے مزید کہا کہ پرامن اور مستحکم افغانستان پاکستان اور خطے کے لیے بہت اہم ہے۔
ملاقات کے دوران ، وزیر اعظم نے ڈینش وزیر اعظم میٹ فریڈرکسن کے ساتھ اپنی سابقہ گفتگو کا حوالہ دیتے ہوئے کہا کہ ” ان کے ساتھ افغانستان کی صورت حال کے ساتھ ساتھ دوطرفہ تعلقات کے بارے میں نتیجہ خیز تبادلہ خیال ہوا تھا۔
وزیر اعظم نے افغانستان میں انسانی بحران اور معاشی تباہی کو روکنے اور ملک میں پائیدار امن اور استحکام کی تعمیر میں مدد کے لیے بین الاقوامی برادری کی تعمیری مصروفیات کی ضرورت پر زور دیا۔
انہوں نے اس بات پر زور دیا کہ ایک جامع سیاسی ڈھانچہ افغانستان کے استحکام کے لیے اہم ہے۔ انہوں نے پاکستان اور ڈنمارک کے درمیان بڑھتے ہوئے تعاون پر اطمینان کا اظہار کیا۔
وزیراعظم عمران خان نے مزید کہا کہ پاکستان تجارت اور سرمایہ کاری اور قابل تجدید توانائی کے شعبوں میں دوطرفہ تعاون کو مزید فروغ دینے کے لیے پرعزم ہے۔
ڈنمارک کے وزیر خارجہ نے وزیراعظم کے 10 ارب درختوں کے اقدام اور پاکستان کی جانب سے ماحولیاتی ترقی کے لیے اٹھائے گئے اقدامات کی تعریف کی۔
جیپی کوفیڈ نے افغانستان سے اپنے شہریوں اور دیگر افراد کے انخلا کے لیے پاکستان کی مدد اور سہولت کے لیے ڈنمارک کی حکومت کی جانب سے شکریہ ادا کیا۔
یہ بھی پڑھیں : پیٹرولیم مصنوعات کی قیمتوں میں اضافہ عوام پر ڈرون حملہ ہے، امیر جماعت اسلامی
