افغانستان میں جامع حکومت ہی امن واستحکام کیلئے آگے بڑھنے کا راستہ ہے، وزیراعظم

اسلام آباد :وزیر اعظم عمران خان نے کہا ہے کہ افغانستان میں جامع حکومت ہی امن واستحکام کیلئے آگے بڑھنے کا راستہ ہے، فغانستان میں جامع حکومت کی تشکیل اورعالمی برادری کا مثبت رویہ انسانی بحران سے بچا سکتا ہے۔

وزیراعظم عمران خان سے روم میں قائم اقوام متحدہ کے عالمی ادارہ خوراک کے ایگزیکٹو ڈائریکٹر ڈیوڈ ایم بیسلے نے جمعرات کو ملاقات کی۔

وزیراعظم نے عالمی ادارہ خوراک کے اس کردار کی تعریف کی جو وہ ہنگامی حالات میں بین الاقوامی انسانی ہمدردی کے اداروں کو خوراک کی معاونت فراہم کرنے اور دنیا بھر میں مختلف ملکوں میں خوراک اور غذائی صورتحال کو بہتر بنانے کے لئے کررہا ہے۔

مزید پڑھیں:آپ کا وزیر اعظم آپ کے ساتھ، عمران خان اتوار کو عوام سے براہِ راست بات کریں گے

وزیراعظم نے کہا کہ پاکستان اپنے ہاں چلائے جانے والے عالمی ادارہ خوراک کے مختلف منصوبوں سے مستفید ہوتا رہا ہے۔

انہوں نے کہا کہ پاکستان عالمی ادارہ خوراک کے ساتھ شراکت داری کی قدر کرتا ہے۔ وزیراعظم اور عالمی ادارہ خوراک کے ایگزیکٹو ڈائریکٹر کے درمیان ملاقات میں افغانستان میں پیدا ہونے والی صورتحال پر بھی تبادلہ خیال کیا گیا۔

وزیراعظم نے افغانستان میں جامع حکومت کی تشکیل کی ضرورت پر زور دیتے ہوئے کہا کہ بین الاقوامی برادری کو افغانستان کے ساتھ مثبت تعلقات قائم کرنے چاہئیں جس کے نتیجے میں افغانستان میں کسی بھی انسانی المیہ سے بچا جاسکتا ہے اور ملک میں امن و استحکام کو یقینی بنایا جاسکتا ہے۔

عالمی ادارہ خوراک کے ایگزیکٹو ڈائریکٹر نے اقوام متحدہ کے ورلڈ فوڈ پروگرام کی جانب سے افغانستان میں خوراک کی معاونت کے لئے پاکستان کے سہولتی کردار پراظہار تشکر کیا۔

انہوں نے افغانستان کے عوام کو انسانی ہمدردی کے تحت معاونت جاری رکھنے کے طریقوں پر وزیراعظم سے تبادلہ خیال کیا۔