گوگل نیوز پر ہمیں فالو کریںاسلام آباد: کورونا وائرس کے بڑھتے ہوئے کیسز کے پیش نظر ویکسینیشن سرٹیفیکیٹ کے بغیر قومی ایئر لائن کے فضائی میزبانوں کی ڈیوٹی پر پابندی عائد کردی گئی ہے۔
پی آئی اے کے شعبہ فلائٹ سروسز سے جاری کردہ نوٹیفکیشن میں کہا گیا ہے کہ بغیر ویکسینیشن سرٹیفیکیٹ پی آئی اے فضائی میزبانوں کے ڈیوٹی کرنے پر پابندی ہوگی، کورونا سے بچاؤ کے ضمن میں فضائی میزبانوں کے ڈیوٹی فری شاپ جانے پر بھی پابندی ہوگی۔
نوٹیفکیشن کے مطابق ویکسین کی ایک یا دو ڈوز کا حامل ہونے پر نادرا کا سرٹیفکیٹ لازمی قرار دیا گیا ہے جب کہ ایک ڈوز کی صورت میں 1166 سے جاری میسیج پیش کرنا بھی ضروری قرار دیا گیا ہے۔
حکومتی ہدایات کے تحت یکم اگست سے بغیر سرٹیفکیٹ اندرون ملک پرواز پر تعیناتی نہیں کی جائے گی، انٹرنیشنل پروازوں کے میزبانوں کے ٹرمینل بلڈنگ میں غیر ضروری نقل و حرکت کی بھی ممانعت ہوگی۔یہ سارا اقدام عملے اور مسافروں کی سیفٹی کے پیش نظر کیا گیا ہے۔
بین الاقوامی پروازوں کے میزبانوں کی جانب سے خلاف ورزی پر جرمانہ عائد کیے جانے کا بھی فیصلہ کیا گیا ہے۔ خلاف ورزی پر جرمانے کی رقم تنخواہ سے منہا اور انضباطی کارروائی بھی کی جائے گی۔
مزید پڑھیں: سندھ میں کورونا کے 2ہزار517 نئے کیسز رپورٹ، مزید 20 افراد زندگی کی بازی ہار گئے
