کراچی: وزیر اطلاعات سندھ سید ناصر شاہ نے کہا ہے کہ ایم کیو ایم کے رہنما عامر خان نے گورنر راج کی بات کر ذہنی پسماندگی کا ثبوت دیا ہے انہیں اپنے دماغ کا معائنہ کروانا چاہیے۔
رہنما ایم کیو ایم عامر خان کے بیان پر ردعمل دیتے ہوئے سید ناصر حسین شاہ کا کہنا ہے کہ جب سے کراچی کی عوام نے ایم کیو ایم پاکستان کا ساتھ چھوڑا ہے ان کی دماغی حالت ٹھیک نہیں ہے۔ یہ ان کی دماغی حالت صرف مسترد ہونے سے نہیں ہوئی بلکہ ان کو گناہوں کی سزا ہے۔
ذوالفقار علی بھٹو سے متعلق عامر خان کے بیان کو غلط بیانی کا پلندہ قرار دیتے ہوئے سید ناصر حسین شاہ نے کہا ہے کہ عامر خان آج بھٹو صاحب کی 1971ء والی بے بنیاد بات کو آج یاد کر رہے ہیں، یہ ریکارڈ کی بات ہے کہ عباس اطہر مرحوم نے یہ بات واضح کی تھی کہ اِدھر تم اُدھر ہم والی بات شہید بھٹو نے نہیں کی تھی۔
انہوں نے عامر خان کو مخاطب کرتے ہوئے مزید کہا کہ آپ برائے مہربانی اپنی ذہنی بیماری کا علاج کرائیں اور نفرت کا چشمہ اتاریں، اس سے ظاہر ہوتا ہے کہ ان کی پرانی یادداشت واپس آئی ہے، ایم کیو ایم کو یاد رکھنا چاہیے کہ پاکستان کی سلامتی کی خاطر کراچی کی عوام نے دہشت گردوں سے جان چھڑائی۔
سید ناصر حسین شاہ کا کہنا تھا کہ ہم کراچی کی خدمت کر رہے ہیں اور اس شہر کو ایم کیو ایم نے تباہ کیا، ایم کیو ایم کے لوگوں کو چاہیے کہ کسی درگاہ پر بیٹھ کر اپنے گناہوں کی معافی مانگیں، ایم کیو ایم کو پیپلز پارٹی اور سندھ حکومت فوبیا ہوگیا ہے، اب ان کو ٹھنڈے پسینے آتے ہیں۔
اُن کا کہنا تھ اکہ ایم کیو ایم کے دوستوں کو کہوں گا کہ خدا کا خوف کریں، حقیقت پسند بنیں، یہ اندرون سندھ اور بیرون سندھ کی بات کر کے نفرت کی سیاست نہ کریں۔
گوگل نیوز پر ہمیں فالو کریں
