ویڈیوز بناکر خواتین کرہراساں کرنے کے الزام میں یوٹیوبر گرفتار، مقدمہ درج

گوجرانوالہ :پنجاب پولیس نے بغیراجازت عوامی مقامات پر ویڈیوز بناکر خواتین کرہراساں کرنے کے الزام میں ایک یوٹیوبر کو گرفتار کرلیا۔

ملزم مذاق کے نام پر خواتین کو مختلف باتوں پر ہراساں کرتا تھا اور گزشتہ کئی دنوں سے سوشل میڈیا پر اس پر خوب تنقید کی جارہی تھی اور پولیس سے ایکشن لینے کا مطالبہ کیا جارہا تھا۔

ملزم پر خواتین سے غیراخلاقی حرکات ، اسلحہ کے زورپرگالم گلوچ کرنے کے الزام میں مقدمہ درج کرلیاگیا ۔گوجرانوالہ پولیس نے لاہور کے علاقے محمود بوٹی میں کارروائی کرکے ملزم محمد علی کو گرفتار کرلیا۔

مزید پڑھیں:ماہرہ خان کی ویب سیریز، شعیب ملک بھی اداکاری کے میدان میں کود پڑے

ملزم گکھڑ منڈی کا رہائشی ہے جس نے سوشل میڈیاپر اپنا چینل بنارکھا ہے۔ ایس پی صدر عبدالوہاب کے مطابق ملزم مزاحیہ ویڈیوز کے ذریعے شہرت حاصل کرنے کے لیے مختلف عوامی مقامات اور پارکس میں بیٹھی خواتین کو ہراساں کرکے ان کی تذلیل کرتا اور ویڈیو سوشل میڈیا پر اپ لوڈ کردیتا تھا۔پولیس نے ملزم کے خلاف مقامی شہری کی مدعیت میں مقدمہ درج کرکے کارروائی شروع کردی ۔

سوشل میڈیا صارفین نے ملزم کی گرفتاری کو سراہتے ہوئے کہا ہے کہ اس طرح کے عناصر اپنے مفاد کیلئے دوسروں کو اذیت سے دوچار کرتے ہیں اور تھانے میں خاتون پولیس اہلکار کے ہتھکڑے پکڑنے کے عمل بھی پذیرائی مل رہی ہے۔