ڈیفنس میں کُھلے مین ہولز کو لاک کیا جائے، شنیرا اکرم کا مطالبہ

کراچی:قومی ٹیم کے سابق کپتان اور نامور فاسٹ بالر وسیم اکرم کی اہلیہ شنیرا اکرم نے کراچی کے علاقے ڈیفنس میں کْھلے مین ہولز کے ڈھکن کو لاک کرنے کا مطالبہ کردیا۔

شنیرا نے ٹوئٹر پر ایک نجی ادارے کی خبر شیئر کی جس میں بتایا گیا کہ نیو کراچی کے علاقے میں 12 سال کا بچہ سیوریج کے مین ہول میں گِر کر جاں بحق ہوگیا۔

اس خبر پر اپنا ردعمل دیتے ہوئے شنیرا نے کہا کہ ’میں نے ڈیفنس ہاؤسنگ سوسائٹی کی توجہ اس جانب دلائی تھی کہ تمام مین ہولز کو ڈھک دیا جائے‘۔

سابق کرکٹر کی اہلیہ نے کہا کہ ’میری توجہ دلانے پر انتظامیہ نے ایسا ہی کیا اور تمام مین ہولز ڈھک دیئے لیکن کچھ عرصے کے بعد اْن مین ہولز کے ڈھکن چوری ہوگئے‘۔

اْنہوں نے مطالبہ کیا کہ ’ہمیں تمام مین ہولز کو ڈھک کر اْنہیں لاک کرنے کی ضرورت ہے کیونکہ کئی افراد اس کی وجہ سے زخمی اور جاں بحق ہوچکے ہیں‘۔شنیرا نے مزید کہا کہ ’ہمیں اس مسئلے کے حل کیلئے مناسب طریقے سے کام کرنے کی ضرورت ہے۔‘