مریم اورنگزیب پر حملہ اور بدتمیزی سیاسی مخالفین کی تربیت کا پتہ دیتی ہے،شہباز شریف

لاہور:پاکستان مسلم لیگ (ن) کے صدر شہباز شریف نے پارٹی رہنماؤں سے بدسلوکی کی شدید مذمت کرتے ہوئے کہا ہے کہ معاشرے کو جنگل بنانا اور عدم برداشت کے رویے ملک اور قوم کے لئے نیک فال نہیں۔

انہوں نے کہا کہ لیڈروں کا کام پانی ڈالنے کا ہونا چاہیے نہ کہ تیل ڈال کر آگ مزید بھڑکانے کا،شاہد خاقان عباسی، احسن اقبال، مصدق ملک، رانا ثنااللہ، مریم اورنگزیب اور مفتاح اسماعیل پر حملہ انتہائی قابل مذمت ہے۔

احتساب عدالت میں پیشی کے موقع پر اپنے بیان میں انہوں نے کہا کہ مریم اورنگزیب پر حملہ اور بدتمیزی سیاسی مخالفین کی تربیت کا پتہ دیتی ہے، احسن اقبال پر جوتا پھینکنے والوں نے دراصل اپنے اخلاقی معیار پر جوتا مارا ہے۔

شہباز شریف کا کہنا تھا کہ افسوس ہے کہ قوم کو اخلاقی پستی، تقسیم اور انتشار کے پاتال میں دھکیلا جارہا ہے،عمران خان اپنے تکبر، سیاسی حسد، ناکامی کے غصے اور جنون کا بدلہ قوم کو باہم دست وگریبان کرکے لینا چاہتا ہے۔

پارٹی رہنماؤں کے جذبے، نظریاتی وابستگی اور جرات کو خراج تحسین پیش کرتا ہوں،قوم اس حکومتی غنڈہ گردی کے رویے کی ایک زبان ہوکر مذمت کرے، یہ معاشرتی ہم آہنگی کے لئے نقصان دہ روش ہے۔

مزید پڑھیں: کس نے کتنے پیسے لئے، شیخ رشید نے ووٹ بیچنے والے پی ٹی آئی ارکان کا بھانڈا پھوڑ دیا