گوگل نیوز پر ہمیں فالو کریںکراچی یونیورسٹی میں اسسٹنٹ پروفیسر پر آئی بی اے کے طلباء اور گارڈز نے مبینہ طور پر تشدد کیا جس کے بعد جامعہ کراچی کے اساتذہ نے تدریسی عمل معطل کرکے شدید احتجاج شروع کردیا ہے۔
تفصیلات کے مطابق جامعہ کراچی کے اساتذہ یونیورسٹی میں اسسٹنٹ پروفیر پر آئی بی اے کے طلباء اور گارڈز کے مبینہ تشدد پر احتجاج کر رہے ہیں۔ اساتذہ نے جامعہ کراچی میں تدریسی عمل معطل کردیا۔ آئی بی اے کے مرکزی دروازے کے سامنے احتجاج شروع ہوگیا ہے۔
جامعہ کراچی کے اساتذہ نے مطالبہ کیا ہے کہ آئی بی اے کی عمارت اور زمین کو جامعہ کراچی کے حوالے کیا جائے اور جامعہ کراچی میں نجی اداروں کی تجاوزات کا خاتمہ کیا جائے۔ جامعہ کراچی کے استاد پر تشدد کرنے والے آئی بی اے طلباء کو بے دخل کیا جائے۔
انجمن اساتذہ جامعہ کراچی نے یونیورسٹی آف کراچی کے استاد ڈاکٹر مصطفیٰ حیدر پر آئی بی اے کے طلباء اور گارڈز کے تشدد کی مذمت کی ہے۔ انجمن اساتذہ نے مطالبہ کیا کہ آئی بی اے استاد پر تشدد میں ملوث افراد کے خلاف فوری کارروائی کرے۔
گزشتہ روز انجمن اساتذہ کا کہنا تھا کہ ہم پیر کے روز جامعہ کراچی میں تمام تدریسی سرگرمیاں معطل کردیں گے جس کے بعد آج صبح 10 بجے سے استاد پر تشدد کے خلاف احتجاج جاری ہے۔ ترجمان جامعہ کراچی کا کہنا ہے کہ امتحانات ملتوی کرنے کے حوالے سے تاحال کوئی فیصلہ نہیں کیا گیا۔
قبل ازیں جامعہ کراچی کے اسسٹنٹ پروفیسر ڈاکٹر مصطفیٰ اپنی گاڑی میں آئی بی اے کے قریب سے گزر رہے تھے اور جب انہوں نے ہارن دیا تو وہاں موجود آئی بی اے کے طلباء نے ان کے ساتھ بدتمیزی شروع کردی۔
بعد ازاں سیکیورٹی گارڈز کے ہمراہ ڈاکٹر مصطفیٰ کے ساتھ مارپیٹ بھی کی گئی۔ جامعہ کراچی کی سیکیورٹی نے 4 گارڈز کو سیکیورٹی آفس طلب کر لیا، تاہم آئی بی اے کی طرف سے تاحال واقعے پر کوئی مؤقف سامنے نہیں آیا۔
یہ بھی پڑھیں: ڈی جی نادراکا ایکشن، خواتین کو نازیبا پیغامات بھیجنے والا ملازم برطرف
