مصطفیٰ کمال کی سیاست کا چراغ گُل ہونے سے پہلے بھڑک رہا ہے، ترجمان متحدہ

کراچی: ایم کیو ایم پاکستان کے ترجمان نے مصطفی کمال کے ڈاکٹر خالد مقبول صدیقی پر بے بنیاد الزامات کو کھسیانا پن قرارداد دیتے ہوئے یکسر مسترد کیا ہے۔

متحدہ قومی موومنٹ پاکستان کے ترجمان نے شہری سندھ کے مسترد کردہ مصطفی کمال کی پریس کانفرنس کو جھوٹ کا پلندہ قرار دیتے ہوئے ان کا کھسیانا پن قرار دیا ہے۔

ترجمان نے کل تک ڈاکٹر خالد مقبول صدیقی کے گن گانے والے مصطفی کمال کے بے بنیاد الزامات کو سیاسی دیوالیہ پن قرار دیا ہے۔ترجمان نے یہ بھی کہا کہ ایسا معلوم ہوتا کہ مصطفی کمال کی سیاست کا چراغ گُل ہونے سے پہلے بھڑک رہا ہے

ترجمان نے کہا کہ ایم کیو ایم پاکستان اور اس کے کنوینر پاکستان کے آئین اور قانون کی پاسداری کرتے ہوئے عوامی جدوجہد کر رہے ہیں جو مصنوعی سیاستدانوں کو گراں گزرتی ہے۔

ترجمان نے کہا کہ ماضی میں بھی مصطفی کمال ایم کیو ایم پاکستان اور پتنگ کو دفن کرنے کے دعویدار رہے لیکن انتخابات میں شہری سندھ کے عوام نے ان کی مصنوعی جماعت اور اس کے نشان کو دفن کر دیا۔

ترجمان نے کہا کہ مصطفی کمال کو پہلے بھی شہری سندھ کے عوام جھوٹ اور گالی گفتار پر مبنی انداز سیاست کے باعث مسترد کر چکے ہیں اور آئندہ بھی ایسا ہوتا نظر آ رہا ہے۔