گوگل نیوز پر ہمیں فالو کریںنوشہروفیروز: پاکستان پیپلز پارٹی کی مقتول رکن سندھ اسمبلی شہناز انصاری کوآہوں اور سسکیوں کے دوران نوشہروفیروز میں واقع اسماعیل شاہ قبرستان میں سپردخاک کردیاگیا۔قبل ازیں ان کی نمازجنازہ گا ئوں چاناری ہائی اسکول کے گرائونڈ پر ادا کی گئی۔
نمازہ جنازہ میں سابق وزیرقانون سندھ ضیاء الحسن لنجار،رکن سندھ اسمبلی ممتاز چانڈیو ،پیپلزپارٹی سندھ کے سیکرٹری اطلاعات عاجز دھامرا، فیروز جمالی، ضلع صدر پیپلزپارٹی نواب شاہ اکبر جمالی ،ڈی سی نوشہرو فیروز،سیاسی ،سماجی شخصیات سمیت اہل علاقہ کی ایک بڑی تعدادنے شرکت کی،اس موقع پر ہر آنکھ اشکبار تھی ۔
نماز جنازہ کے بعد کارکنان اور ورثاء نے ملزمان کی گرفتاری کے نعرے لگائے۔اس موقع پر پیپلز پارٹی رہنما عاجز دھامرا نے میڈیا سے بات چیت کرتے ہوئے کہاکہ ایم پی اے شہناز انصاری کو دن دہاڑے قتل کردیا گیا، ایم پی اے قتل ہوگئی لیکن آئی جی سندھ آرام سے سوئے ہوئے ہیں۔ آئی جی کے ٹرانسفر سے روکیں گے تو جرائم پیشہ افراد متحرک ہوجائیں گے۔
انہوں نے کہا کہ صوبائی حکومت پولیس پر گرفت نہیں رکھے گی تو ایسے حالات پیدا ہوں گے۔صوبائی وزیرشہلا رضا بھی تعزیت کے لئے مقتولہ کے گھر پہنچیں۔انہوں نے مقتولہ کے اہل خانہ سے تعزیت کی اورمرحومہ کے لیے دعائے مغفرت کی ۔
ایس ایس پینوشہرو فیروز ڈاکٹر محمد فاروق نے میڈیا سے بات چیت کرتے ہوئے بتایاکہ ایم پی اے شہناز انصاری کو قتل کرنے والے افراد کی شناخت ہوگئی ہے انکے قاتلوں کی گرفتاری کے لیے چھاپے مارے جارہے ہیں۔
انہوں نے بتایا کہ شہناز انصاری کی بہن شبانہ کا سسرالیوں سے زمین کا تنازع چل رہا ہے، شہناز انصاری بہنوئی زاہد کھوکھر کے چالیسویں پر گائوں گئی تھیں، جہاں زاہد کھوکھر کے آبائی گھر کے ساتھ ہی ملزمان کا گھر ہے۔
مزید پڑھیں: رہنما پیپلزپارٹی شہناز انصاری نوشہرو فیروز میں قاتلانہ حملے میں جاں بحق
