الیکشن کمیشن میں فیصل واوڈا کی نا اہلی کے لیے دائر درخواست سماعت کے لیے مقرر

اسلام آباد: الیکشن کمیشن نے شہریت سے متعلق جعلی حلف نامہ جمع کرانے کے معاملے پر وفاقی وزیر فیصل واوڈا کی نا اہلی کے لیے دائر درخواست سماعت کے لیے مقرر کردی ہے۔

الیکشن کمیشن 3 فروری کو وفاقی وزیر فیصل واوڈا کی نااہلی کے لیے دائر درخواست پر سماعت کرے گا، اس سلسلے میں الیکشن کمیشن کی جانب سے فیصل واوڈا سمیت تمام فریقین کو نوٹس جاری کر دیے ہیں۔

فیصل واوڈا کے خلاف درخواست امن ترقی پارٹی کے چیئرمین فائق شاہ کی طرف سے دائر کی گئی ہے جس میں موقف اختیار کیا گیا ہے کہ فیصل واوڈا نے 2018 کے انتخابات کےدوران اپنی شہریت کے حوالے سے کاغذات نامزدگی میں جعلی حلف نامہ جمع کرایا۔

یہ بھی پڑھیں: جعلی حلف نامہ کا معاملہ ، وفاقی وزیر فیصل واوڈا کی نا اہلی کے لیے الیکشن کمیشن میں درخواست دائر

درخواست میں کہا گیا ہے کہ فیصل واوڈا مسلسل جھوٹ، دباوٴ اور دیگر ہتھکنڈے استعمال کر رہے ہیں، اعلیٰ عدلیہ اس سے قبل دوہری شہریت رکھنے پر 2 سینیٹرز کو نا اہل کر چکی ہے، فیصل واوڈا صادق اور امین نہیں رہے، انہیں آئین کی شق 62 ون ایف کے تحت نا اہل کیا جائے۔