گوگل نیوز پر ہمیں فالو کریںاسلام آباد : صدر مملکت ڈاکٹر عارف علوی نے واضح کیا ہے کہ ایف اے ٹی ایف کو سیاسی مقاصد کے لئے استعمال نہیں ہونا چاہیے، مہنگائی اور افراط زر پر قابو پانے کے لئے محنت کی ضروت ہے، مہنگائی پر قابو پائے بغیر شرح سود کو کم نہیں کیا جا سکتا۔
ایوان صنعت و تجارت اسلام آباد کے زیر اہتمام کی تقریب سے خطاب کرتے ہوئے صدر مملکت نے کہا کہ مہنگائی پر قابو پائے بغیر شرح سود کو کم نہیں کیا جا سکتا، مہنگائی اور افراط زر پر قابو پانے کے لئے محنت کی ضروت ہے۔
صدر عارف علوی نے کہاکہ سٹیٹ بینک آف پاکستان کے اعداد وشمار کے مطابق فروری میں مہنگائی اور شرح سود میں کمی کا امکان ہے۔ انہوں نے کہا کہ ایف اے ٹی ایف کو سیاسی مقاصد کے لئے استعمال نہیں ہونا چاہیے۔ وزیر اعظم بھی اس معاملے پر امریکی صدر سے بات کر چکے ہیں۔
صدر مملکت نے کہا کہ افرادی قوت کے حوالے سے پاکستان دنیا کا چھٹا بڑا ملک ہے۔ ہمارا چیلنج ہے کہ مہنگائی کم کر کے لوگوں کی قوت خرید کو بڑھانا ہے۔ وزیر اعظم عمران خان مہنگائی میں کمی کے لئے ہر ہفتے اجلاس منعقد کرنے کا اراداہ رکھتے ہیں، پاکستان میں افرادی قوت نوجوانوں پر مشتمل ہے۔
انہوں نے کہا کہ پاکستان میں اعلیٰ تعلیم یافتہ لوگ مواقع نہ ہونے سے بیرون ملک چلے جاتے ہیں، پاکستان میں فلاحی کاموں میں مخیر حضرات کا بہت بڑا کردار ہے۔ چھوٹے اور درمیانے درجے کی صنعتوں کو فروغ دینے کی ضرورت ہے۔ حکومت اس حوالے سے مؤثر اقدامات کررہی ہے۔
یہ بھی پڑھیں: گورنرسندھ عمران اسماعیل سے ٹرانسپورٹر ز وفد کی گورنرہاؤس میں ملاقات
