فخر زمان پاکستان سپر لیگ میں لاہور قلندرز کی کامیابی کیلئے پر امید

لاہور: قومی ٹیم کے اوپننگ بلے باز فخر زمان پاکستان سپر لیگ میں لاہور قلندرز کی کامیابی کیلئےپر امید ہیں ، ان کا کہنا تھا کہ لاہور قلندرز کی ٹیم اس بار شائقین کو مایوس نہیں کرے گی اور ٹاپ پر نظر آئے گی۔

ایک ویڈیو پیغام میں جارح مزاج بلے باز فخر زمان نے کہا کہ لاہور قلندر پچھلے سیزن میں اچھا پرفارم نہیں کرسکی لیکن اس بار لاہور قلندرز شائقین کو مایوس نہیں کرے گی اور پی ایس ایل فائیو میں ٹاپ پوزیشن پر نظر آئے گی۔

فخر زمان نے کہا کہ اس بار لاہور قلندرز نئے کپتان کی قیادت میں میدان اترے گی اور امید ہے پلیئرز ایک نئے عزم اور نئے جذبے کے ساتھ کھیلتے ہوئے نظر آئیں گے، انہوں نےشائقین کرکٹ سے درخواست کی کہ وہ ان کی ٹیم کو سپورٹ کرتے رہیں ۔

اس سے قبل فخر زمان کا اپنے پیغام میں کہنا تھا کہ وہ پاکستان سپرلیگ کے سیزن 5 میں پلیئر آف دی ٹورنامنٹ ایوارڈ کے لئے کوشاں ہیں، انہوں نے کہا کہ ہر کھلاڑی کے انفرادی گول ہوتے ہیں اور میری پوری کوشش ہوگی کہ میں ٹورنامنٹ کا بہترین کھلاڑی بنوں اور اپنی ٹیم کو پی ایس ایل جتوانے کااعزاز حاصل کروں۔

یہ بھی پڑھیں: پاکستان کرکٹ بورڈکے چیف فنانشل آفیسر نے عہدے سے استعفیٰ دے دیا

ان کامزید کہنا تھا کہ ہمارے لیے حوصلہ افزا بات ہے کہ لاہور قلندرز 8 میچز اپنے ہوم گراؤنڈ پرکھیلے گی جہاں ہم پورا سال کھیلتے ہیں اور ہمیں کراؤڈ کی سپورٹ حاصل ہوگی اور ہم پرامید ہیں کہ بطور ٹیم ہم واقعی عمدہ کارکردگی کا مظاہرہ کریں گے۔

واضح رہے کہ لاہور قلندرز کی ٹیم گزشتہ چاروں سیزن میں ٹیبل پر آخری نمبر پر رہی تھی ، لاہور قلندرز نے اس بار انٹرنیشنل کرکٹ نہ کھیلنے والے سہیل اختر کو ٹیم کا کپتان مقرر کیا ہےاور ٹیم میں زیادہ ترکھلاڑی ڈویلپمنٹ پروگرام کےشامل ہیں۔

پاکستان سپر لیگ کا سیزن 5 ، 20 فروری سے 22 مارچ تک ملک کے مختلف شہروں میں کھیلا جائے گا ، پی ایس ایل کی تاریخ میں یہ پہلا موقع ہےکہ تمام میچز پاکستان میں ہی کھیلے جائیں گے،کراچی ، لاہور ، راولپنڈی اور ملتان ایونٹ کی میزبانی کرتے ہوئے نظر آئیں گے۔