گوگل نیوز پر ہمیں فالو کریںبھارتی اپوزیشن جماعت کانگریس نے بھارتیہ جنتا پارٹی (بی جے پی) کے آئی ٹی سیل کے سربراہ اور ریپبلک ٹی وی چینل کے اینکر ارناب گو سوامی کے خلاف مقدمہ درج کروا دیا ہے۔
کانگریس کی جانب سے یہ اقدام مبینہ جھوٹی خبروں کے پھیلاؤ، نفرت انگیزی اور عوام کو گمراہ کرنے کے الزامات کے تحت کیا گیا ہے۔
انڈین میڈیا کے مطابق ہائی گراؤنڈز پولیس اسٹیشن میں امیت مالویہ اور ارنب گوسوامی کے خلاف مقدمہ انڈین یوتھ کانگریس کے قانونی سیل کے سربراہ شری کانت سوروپ کی شکایت پر درج کیا گیا۔
شری کانت سوروپ نے امیت مالویہ اور ارنب گوسوامی پر واضح طور پر جھوٹی خبریں پھیلانے کیلیے ایک گھناؤنی اور مجرمانہ مہم کے ماسٹر مائنڈ ہونے کا الزام لگایا۔
کانگریس کے ترجمان کے مطابق بی جے پی کا آئی ٹی سیل اور ارنب گوسوامی جان بوجھ کر ایسی خبریں چلاتے رہے ہیں جن کا مقصد اپوزیشن کو بدنام کرنا اور عوامی رائے کو گمراہ کرنا ہے۔
کانگریس کے ترجمان نے کہا کہ ملک میں نفرت کا بیج بونے والوں کے خلاف قانونی کارروائی ناگزیر ہو چکی ہے۔
کانگریس رہنما نے پریس کونسل آف انڈیا، وزارت اطلاعات و نشریات، سی بی آئی اور دیگر ایجنسیوں پر زور دیا کہ وہ اس شکایت کو ہنگامی طور پر دیکھیں۔
کانگریس کی جانب سے درج کروائے گئے مقدمے پر بی جے پی یا ارنب گوسوامی کی جانب سے تاحال اس مقدمے پر کوئی باضابطہ ردعمل سامنے نہیں آیا۔
