کھانے پینے کی اشیاء پر ایکسائز ڈیوٹی، بجٹ کے بعد کیا کیا مہنگا ہونے والا ہے؟

وفاقی حکومت آئندہ مالی سال 2025-26کے بجٹ میں بالواسطہ ٹیکس آمدن بڑھانے کے لیے 50 سے زائد انتہائی پراسیسڈ (تیار شدہ) خوراکی اشیاء پر 5 فیصد فیڈرل ایکسائز ڈیوٹی عائد کرنے پر غور کر رہی ہے۔

یہ معلومات فیڈرل بورڈ آف ریونیو (ایف بی آر) کے ذرائع نے پروپاکستانی کو فراہم کیں جس کے مطابق جن اشیاء پر مجوزہ ڈیوٹی لاگو ہو سکتی ہے، ان میں فروزن اشیاء، چپس، مشروبات، نوڈلز، بسکٹ، آئس کریم، فروزن گوشت، چٹنیاں، تیار کھانے، ساسیجز اور دیگر متنوع پراسیسڈ فوڈ آئٹمز شامل ہیں۔

حکام کے مطابق اس اقدام کا مقصد آئندہ مالی سال میں آمدنی میں نمایاں اضافہ کرنا ہے۔

اگر یہ تجویز منظور ہو جاتی ہے، تو یہ بالواسطہ ٹیکس آمدن کے لحاظ سے حکومت کی سب سے بڑی کوشش ہو گی، جو فیڈرل ایکسائز ڈیوٹی کے دائرہ کار کو بڑھانے کی حکومتی حکمت عملی کا حصہ ہے۔یہ تجویز اس وقت زیرِ غور ہے اور توقع ہے کہ آئندہ بجٹ کے مباحثے میں اسے شامل کیا جائے گا۔