گوگل نیوز پر ہمیں فالو کریںنجی پاکستانی کارگو ائیرلائن کے ٹو اییر ویز اور چین کی سرکاری کوشے ڈیولپمنٹ اینڈ لاجسٹک کمپنی کے درمیان کارگو پروازیں چلانے کا معاہدہ ہو گیا۔
کے ٹو ایئر ویز اس مہینے کے آخر سے اپنی پروازوں کا آغاز کرے گی اور کراچی سے براستہ لاہور چین کے شہر کاشغر کے لیے ہفتہ وار 3 پروازیں چلائی جائیں گی۔
معاہدے پر دستخط کی تقریب کراچی کے مقامی ہوٹل میں ہوئی جس میں وزیر صنعت و تجارت سندھ جام اکرام اللہ دھاریجو مہمان خصوصی تھے جبکہ چینی قونصل خانے کے نمائندے بھی تقریب میں شریک ہوئے۔
جام اکرام اللہ دھاریجو نے کہا کہ پاکستان اور چین برادر ملک ہیں جو پہلے ہی سی پیک جیسے عظیم منصوبے سے جڑے ہیں، پاکستان اور چین کے درمیان ائیر کارگو سروس سے دونوں ملکوں میں تجارتی سرگرمیوں کو فروغ حاصل ہوگا۔
سی ای او کے ٹو ائیر ویز طارق راجہ نے کہا کہ کے ٹو ائیر ویز پاکستان کی پہلی کارگو ائیر لائن ہے جس نے چین کے لیے کارگو سروس شروع کی ہے، کے ٹو ائیر ویز کراچی سے براستہ لاہور کاشغر کے لیے کارگو پروازیں آپریٹ کرے گی، جلد ہی کراچی لاہور اور اسلام آباد سے چین کے مزید شہروں کے لیے بھی کارگو پروازیں چلائی جائیں گی۔
چینی لاجسٹک کمپنی کے نمائندے نےکہا کہ کاشغر چین کا بہت اہم تجارتی شہر ہے، کے ٹو ائیرویز سے ہمارا یہ معاہدہ مستقبل میں ہمیں کاشغر سے آگے بھی لے جائے گا۔
