گوگل نیوز پر ہمیں فالو کریںکراچی: الیکٹرانک جرائم کی روک تھام کے قانون کے تحت سابقہ منگیتر کی نجی تصاویر شیئر کرنے پر شخص کو 9 سال قید کی سزاسنائی گئی ہے۔
جمعرات کے روز کراچی کی ایک عدالت نے محمد شعیب کو سابق منگیتر کی قابل اعتراض تصاویر اور ویڈیوز سوشل میڈیا پر شیئر کرنے کے جرم میں 9 سال قید کی سزا سنائی۔
یہ فیصلہ الیکٹرانک جرائم کی روک تھام کے قانون (پیکا) کے تحت دیا گیا جس میں محمد شعیب کو قصوروار ٹھہرایا گیا۔ عدالت نے 9 سال قید کے ساتھ 90000 روپے جرمانے کی بھی سزا سنائی۔
عدالت نے یہ بھی نوٹ کیا محمد کہ شعیب کو 2017 میں ایک ایسے ہی کیس میں سزا سنائی گئی تھی اور اس کا اپیل کیس سندھ ہائی کورٹ میں زیر التوا ہے۔
اس کیس میں محمد شعیب پر الزام تھا کہ اس نے اپنی سابق منگیتر کو ہراساں کیا، اس کی عزت خراب کرنے کے ارادے سے قابل اعتراض مواد سوشل میڈیا پر شیئر کیا۔
وفاقی تحقیقاتی ایجنسی (ایف آئی اے ) کے مطابق محمد شعیب نے منگنی ٹوٹنے کے بعد متاثرہ خاتون کی نجی تصاویر اور ویڈیوز آن لائن پوسٹ کیں، جس سے ان کی شہرت کو نقصان پہنچا۔
