گوگل نیوز پر ہمیں فالو کریںافغان نائب وزیر اعظم مولوی عبدالسلام حنفی نے مطالبہ کیا ہے کہ پاکستان افغان مہاجرین کی ملک بدری کے فیصلے پر نظر ثانی کرے۔
ان خیالات کا اظہار انہوں نے افغانستان میں پاکستانی سفیر عبید الرحمن نظامانی سے گفتگو کے دوران کیا، جنہوں نے ان کے آفس میں ان سے ملاقات کی۔
افغان ایوان صدر سے جاری پریس ریلیز کے مطابق ملاقات کے دوران مولوی عبدالسلام حنفی نے گفتگو کرتے ہوئے کہا کہ افغانستان اور پاکستان دو ہمسایہ اور مسلم ممالک ہیں، ان کے درمیان اچھے تعلقات دونوں ممالک کے مفاد میں ہیں۔
مولوی عبدالسلام حنفی نے کہا کہ دونوں ممالک میں بہت سی چیزیں مشترک ہیں، انہوں نے کہا امارت اسلامیہ تمام پڑوسی ممالک بالخصوص پاکستان کے ساتھ اچھے تعلقات اور مثبت تعامل چاہتی ہے۔
اسرائیل فلسطین تنازع: ایم ٹی وی ایوارڈز کی تقریب منسوخ ہوگئی
انہوں نے کہا کہ پاکستان ایک ماہ کے اندر افغان مہاجرین کو ڈی پورٹ کرنے کے فیصلے پر نظرثانی کرے کیونکہ ایسے فیصلوں سے رائے عامہ پر منفی اثرات مرتب ہوتے ہیں، دونوں قوموں اور ممالک کے درمیان فاصلے بڑھتے ہیں اور کسی بھی فریق کو فائدہ نہیں ہوتا۔
ساتھ ہی انہوں نے مطالبہ کیا کہ نکالے جانے والے افغان باشندوں کو طورخم اور اسپن بولدک تک سفر کے لیے سہولیات فراہم کی جائیں اور ان کے ساتھ اسلامی بھائی چارے اور اچھے ہمسائے کی بنیاد پر سلوک کیا جائے، جن لوگوں کو گرفتار کیا گیا ہے انہیں جیلوں سے رہا کیا جائے۔
پاکستانی سفیر عبیدالرحمٰن نظامانی نے ہرات میں حالیہ زلزلے سے ہونے والے جانی نقصان پر دکھ کا اظہار کیا اور تعزیت کرتے ہوئے کہا کہ وہ امارت اسلامیہ کا پیغام اور مطالبات اسلام آباد میں اپنے حکام تک پہنچائیں گے۔
انہوں نے کہا ہم افغانستان کی صورتحال کو اقتصادی، سیاسی اور تجارتی تمام شعبوں میں بہتر بنانا چاہتے ہیں۔
پاکستان کے سفیر نے کہا کہ ہم ان تمام مسائل کو حل کرنے کی کوشش کر رہے ہیں جو دونوں ممالک کے درمیان فاصلے پیدا کرتے ہیں۔
افغان نائب وزیر اعظم نے کہا امارت اسلامیہ کی کسی پڑوسی ملک کے ساتھ کوئی عداوت نہیں ہے اور وہ تمام ممالک کے ساتھ بہتر تعامل کی بنیاد پر اچھے تعلقات چاہتی ہے۔
