قومی ائیر لائن کی پروازیں تاخیر کا شکار، مسافر ائیرپورٹس پر طویل انتظار سے نڈھال

اسلام آباد: قومی ائیر لائن  (پی آئی اے) کی بین الاقوامی اور قومی پروازیں تاخیر کا شکار ہیں، مسافر ائیرپورٹس پر طویل انتظار کے باعث نڈھال ہوگئے۔ 

تفصیلات کے مطابق قومی ائیر لائن کی پروازوں کا شیڈول بری طرح متاثر ہوا ہے۔ سعودی عرب سے آنے والے عمرہ زائرین 12 گھنٹے سے زائد وقت ائیرپورٹس پر گزارنے کی وجہ سے مشکلات کا شکار ہیں۔

مہنگائی کی مجموعی شرح 37 فیصد پر پہنچ گئی، 19 اشیائے ضروریہ مہنگی

پی آئی اے کی جدہ سے اسلام آباد کیلئے پرواز میں 9 گھنٹے سے زائد کی تاخیر ہوئی، پرواز پی کے 760 جدہ سے اسلام آباد کیلئے دوپہر 12 بجے روانہ ہونے کے بجائے رات 9 بج کر 11 منٹ پر روانہ ہوئی تھی۔ مسافروں کو طویل انتظار کرنا پڑا۔

جدہ سے آنے والی پرواز طے شدہ وقت شام 7 بجے کی جگہ رات ساڑھے 3 بجے اسلام آباد پہنچی۔ اسی طرح جدہ سے لاہور کیلئے پرواز پی کے 762 کی روانگی میں 5گھنٹے تاخیر ہوئی۔اسی روٹ پر ایک اور پرواز پی کے 742 بھی ساڑھے 4گھنٹے تاخری سے روانہ ہوئی۔ 

سعودی دارالحکومت ریاض سے لاہور کیلئے قومی ائیر لائن کی پرواز پی کے 726 کی روانگی میں 4 گھنٹے 20 منٹ، شارجہ سے لاہور کیلئے پی کے 186 کی روانگی میں 5 گھنٹے 27 منٹ جبکہ مدینہ سے کراچی کی پرواز پی کے 744 کی روانگی میں 10 گھنٹے کی تاخیر ہوئی۔