گوگل نیوز پر ہمیں فالو کریںماسکو: روس کے صدر ولادی میرپیوٹن نے کہا ہے کہ ہم روس کے خلاف مسلح بغاوت کرنے والوں اور مسلح بغاوت کرنے والے عناصر کو کچل دیں گے۔
تفصیلات کے مطابق صدر ولادی میر پیوٹن نے روسی قوم سے خطاب کرتے ہوئے کہا کہ ہم خانہ جنگی نہیں دہرانے دیں گے، نہ ہی اپنے لوگوں اور ملک کو کسی بھی خطرے سے دوچار ہونے دیں گے، جس میں اندرونی خطرات بھی شامل ہیں۔
روس کے ویگنر گروپ کا فوج کے خلاف بغاوت کا اعلان
ویگنر گروپ کی بغاوت کو ملک کیلئے مہلک خطرہ قرار دیتے ہوئے روسی صدر نے کہا کہ ہم بغاوت کے ذمہ داروں کو سزا دیں گے۔ اس گروپ نےمشترکہ مقاصد کیلئے جنگ لڑی، تاہم غداری کی وجہ نامناسب مقاصد اور ذاتی مفادات ہیں۔
روسی صدر ولادی میر پیوٹن نے کہا کہ ویگنر گروپ نے جو کارروائی شروع کی ہے، وہ ملک اور عوام کے ساتھ غداری ہے۔ یہ ملک کی پیٹھ میں چھرا گھونپنے کی طرح اور عین بغاوت ہے جس کا ہمیں سامنا کرنا پڑ رہا ہے۔
صدر ولادی میر پیوٹن نے کہا کہ جو لوگ جانتے بوجھتے بغاوت کے راستے پر چل رہے ہیں اور جو ایک مسلح بغاوت کرچکے ہیں اور پھر بلیک میلنگ اور دہشت گردی کی راہ پر گامزن ہیں۔ ان کو سزا دینا ناگزیر ہوچکا ہے۔
