اپوزیشن لیڈر ہمارا ہوگا، 44اراکینِ اسمبلی استعفے واپس لے رہے ہیں۔اسد عمر

لاہور: پی ٹی آئی رہنما و سابق وفاقی وزیر اسد عمر نے کہا ہے کہ   قومی اسمبلی کا اپوزیشن لیڈر ہمارا ہوگا جبکہ تحریکِ انصاف کے 44اراکینِ اسمبلی استعفے واپس لے رہے ہیں۔

سماجی رابطے کی ویب سائٹ ٹوئٹر پر اپنے پیغام میں پی ٹی آئی کے مرکزی رہنما اسد عمر نے کہا کہ کیونکہ اسپیکر قومی اسمبلی ابھی تک تمام پی ٹی آئی اراکین کے استعفے قبول نہیں کر رہے، اس لیے پارٹی چیئرمین عمران خان نے ہدایات جاری کی ہیں۔

یہ بھی پڑھیں:

پی ٹی آئی نے محسن نقوی کی وزیر اعلیٰ تقرری  مسترد کردی

ٹوئٹر پیغام میں اسد عمر نے کہا کہ پارٹی چیئرمین کی ہدایات کے مطابق تحریکِ انصاف کے 44 اراکینِ اسمبلی نے اپنے استعفے واپس لینے کا فیصلہ اسپیکر قومی اسمبلی کو ای میل کردیا ہے۔ اگلا قدم قومی اسمبلی میں پی ٹی آئی کے اپوزیشن لیڈر کی نامزدگی ہوگی۔

کیونکہ سپیکر ابھی تک تمام اسمبلی ارکان کے استعفے قبول نہیں کر رہے، اس لئے پارٹی چیئرمین کی ہدایات کے مطابق 44 ارکان اسمبلی نے اپنے استعفے واپس لینے کا فیصلہ سپیکر قومی اسمبلی کو ای میل کر دیا ہے. اگلا قدم اپوزیشن لیڈر کی نامزدگی ہو گی. pic.twitter.com/qx86MCyTBK

— Asad Umar (@Asad_Umar) January 23, 2023

خیال رہے کہ اس سے قبل سابق وزیر اعظم عمران خان کے خلاف تحریکِ عدم اعتماد کی منظوری کے ساتھ ہی پی ٹی آئی نے تمام اسمبلیوں سے استعفے دینے کا عندیہ دیا تھا، تاہم بعض اراکینِ اسمبلی نے استعفے واپس لے لیے۔

حال ہی میں اسپیکر قومی اسمبلی راجہ پرویز اشرف نے پی ٹی آئی کی جانب سے پنجاب اور خیبر پختونخوا اسمبلیوں کی تحلیل کے ردِ عمل کے طور پر تحریکِ انصاف کے اراکین کے استعفے منظور کرنے کا عندیہ دیا تھا، تاہم پی ٹی آئی نے استعفوں سے پیچھے ہٹنے کا اعلان کردیا ہے۔