اسلام آباد دھماکے میں جامعہ فرقانیہ پنڈی کے دو طلبہ بھی زخمی ہوگئے ہیں، جنہیں پمز اسپتال منتقل کر دیا گیا ہے، ایک کی حالت تشویشناک جبکہ ایک طالبعلم کو معمولی زخم آیا ہے۔

 جامعہ فرقانیہ مدنیہ کوہاٹی بازار راولپنڈی کے ناظم اعلٰی مولانا زبیر زرین کے مطابق تخصص فی الفقہ کے طالبعلم نوید احمد اور دورہ حدیث کے طالبعلم انعام الرحمن شاہین کرکٹ گراؤنڈ سے کرکٹ کھیل کر واپس آ رہے تھے کہ راستے میں دھماکے کی زد میں آگئے۔

یہ بھی پڑھیں:

زخمی ہونے والے طلبہ کو پمز ہسپتال منتقل کر دیا گیا جہاں جامعہ کے مہتمم مولانا عبدالمجید ہزاروی اور دیگر علماء کرام نے ہسپتال میں زخمی طلبہ کی عیادت کی۔

دریں اثنا وفاق المدارس العربیہ پاکستان کے ناظم برائے پنجاب مولانا قاضی عبدالرشید، رکن مجلس عاملہ مولانا ظہور احمد علوی،مولانا عبدالغفاراور مولانا مفتی عبدالسلام سمیت دیگر نے اس حادثے پر اظہار افسوس کیا اور شہید ہونے والے پولیس اہلکار کے درجات کی بلندی اور مدرسہ کے طلبہ سمیت دیگر زخمیوں کی جلد صحت یابی کے لیے خصوصی دعا کی۔