گوگل نیوز پر ہمیں فالو کریںصوبہ گلگت بلتستان کے ضلع چلاس میں ہونے والے سہہ روزہ تبلیغی اجتماع میں صوبے کے اہل تشیع رہنماؤں نے بھی شرکت کی، جس کو عوامی سطح پر بھرپور پذیرائی ملی ہے۔
چلاس میں ہونے والا سہ روزہ سالانہ تبلیغی اجتماع صوبے کا بڑا تبلیغی اجتماع ہوتا ہے جس میں گلگت بلتستان سمیت قرب و جوار کے اضلاع اور ڈاون ڈسٹرکٹس سے تبلیغی جماعت کی بزرگ شخصیات شرکت کرتی ہیں۔
گزشتہ دن اجتماع کےدوران اس وقت اتحاد بین المسلمین کا بہترین مظاہرہ سامنے آیا جب انجمن امامیہ گلگت بلتستان کے نومنتخب صدر ساجد علی بیگ و شیعہ علما کونسل گلگت بلتستان کے وفد نے اجتماع میں خصوصی طور پر شرکت کرکے عوام کو اتحاد بین المسلمین کا عملی پیغام دیا۔
تبلیغی اجتماع میں شیعہ مذہبی رہنماؤں کی شرکت کی خبر سوشل میڈیا کے پلیٹ فارمز پر پھیلی تو سبھی نے خوشگوار حیرت کا اظہار کیا اور اس عمل کی تحسین اور پذیرائی کا سلسلہ ہنوز جاری ہے۔
تبلیغی جماعت ایک غیر سیاسی جماعت ہے، دیوبند مسلک سے تعلق کے باوجود تبلیغی جماعت مسلکی اختلافات سے دور رہتی ہے اور دین کے ان اعمال کی طرف معاشرے کو دعوت دیتی ہے جو تمام مسالک اور مکاتب فکر میں مشترک ہیں۔
خیال رہے کہ چند سال قبل ممتاز مبلغ مولانا طارق جمیل نے گلگت بلتستان میں اہل تشیع مکتب فکر کے سب سے بڑے مرکز میں حاضری دی تھی جہاں ان کا خطاب بھی ہوا تھا۔
