آرمی چیف کی چینی وزیر دفاع سے ملاقات، دوطرفہ تعلقات پر تبادلہ خیال

بیجنگ: آرمی چیف جنرل قمر جاوید باجوہ نے پیر کو چینی دارالحکومت میں چینی وزیر دفاع سے ملاقات کی جس میں سیکیورٹی اور دوطرفہ تعلقات پر تبادلہ خیال کیا گیا۔

آرمی چیف آج دو روزہ سرکاری دورے پر چین کے دارالحکومت پہنچے اور چینی وزیر دفاع سے ملاقات کی۔

آئی ایس پی آر کے مطابق ملاقات کے دوران چینی وزیر دفاع نے کہا کہ ان کا ملک پاکستان اور اس کی فوج کے ساتھ تعلقات کو بہت اہمیت دیتا ہے۔

انہوں نے یہ بھی کہا کہ CPEC کی ترقی کا مقصد دونوں ممالک کے عوام کے لئے مزید فوائد اور خوشحالی لانا ہے اور انہوں نے پاک چین فوجی تعاون کو دو طرفہ تعلقات کا ایک اہم ستون قرار دیا۔

آئی ایس پی آر کے مطابق چینی وزیر دفاع نے پاکستان میں (CPEC) منصوبوں اور علاقائی استحکام کی کوششوں کے لیے محفوظ ماحول کی فراہمی کے لیے کیے گئے خصوصی اقدامات پر آرمی چیف کا شکریہ ادا کیا۔

”انہوں نے CPEC پر پیش رفت پر اطمینان کا اظہار کیا اور منصوبے کی بروقت تکمیل کی امید ظاہر کی۔”

مزید برآں، چینی وزیر دفاع نے پاکستان میں سیلاب سے ہونے والی تباہی پر دکھ کا اظہار کیا اور متاثرین کے اہل خانہ سے دلی تعزیت کی۔

مزید پڑھیں:وزیر اعظم کی برطانوی بادشاہ چارلس سوم سے ملاقات، ملکہ کے انتقال پر تعزیت

آئی ایس پی آر کے مطابق چینی وزیر دفاع نے کہا کہ چین پاکستان میں سیلاب سے متعلق امدادی سرگرمیوں کے لیے تکنیکی مدد فراہم کرنے کے لیے تیار ہے اور انہوں نے سیلاب سے متاثرہ علاقوں میں پاک فوج کی ریسکیو اور ریلیف کی کوششوں کو سراہا۔