ہم عالمی امن کے داعی، اسلام کا دہشت گردی سے کوئی تعلق نہیں۔ترک صدر

انقرہ: ترکیہ کے صدر رجب طیب ایردوان نے کہا ہے کہ ہم عالمی امن کے داعی ہیں جبکہ اسلام کا دہشت گردی سے کوئی تعلق نہیں ہے۔

تفصیلات کے مطابق ترک صدر رجب طیب ایردوان نے ترکش امریکن نیشنل اسٹیئرنگ کمیٹی اجلاس میں شرکت کی۔ اجلاس سے خطاب کرتے ہوئے ترک صدر نے کہا کہ امریکی دوستوں سے توقع کرتے ہیں کہ وہ بیمار ذہنیت دفن کردیں گے۔

یہ بھی پڑھیں:

دنیا میں اسلام دشمنی کینسر کی طرح پھیل رہی ہے۔ ترک صدر

اجلاس سے خطاب کے دوران ترک صدر رجب طیب ایردوان نے کہا کہ ایک بیمار ذہنت اسلام اور مسلمانوں کے خلاف نفرت کے بیج بو رہی ہے۔ اسلام کا دہشت گردی سے کوئی تعلق نہیں جبکہ ہم عالمی امن کے داعی ہیں۔

خیال رہے کہ اس سے قبل ترکیہ کے صدررجب طیب اردگان نے کہا کہ دنیا میں اسلام دشمنی کینسر کی طرح پھیلتی جارہی ہے۔نائن الیون کے بعد سے امریکا کی شروع کردہ حکمتِ عملی نے اسلام دشمنی کو فروغ دیا۔

بین الاقوامی نیوز ایجنسی کے مطابق گزشتہ برس مئی میں پہلے عالمی میڈیا و اسلام و فوبیا سمپوزیم سے خطاب کے دوران ترک صدرنے کہا کہ امریکا کی مسلمانوں کے خلاف حکمت عملی نے دنیا کے کئی معاشروں میں پہلے سے ہی موجود اسلام دشمنی کے وائرس کومزید شہہ دی۔

ترک صدر نے مزید کہا کہ دوسری جنگِ عظیم کے دوران یہودی نسل کشی پرشدید ردعمل کا مظاہرہ کرنے والے اب مسلمانوں کو ہدف بنائے ہوئے ہیں۔ حقیقت سے منہ پھیرنے والوں نے اسلام کے خلاف نہیں بلکہ اپنے ہی مستقبل سے دشمنی مول لے رکھی ہے۔