کراچی پولیس نے تاوان کیلئے اغوا ہونے والے 9 سالہ عبداللہ کو بازیاب کرالیا

کراچی: کراچی پولیس کے اینٹی وائلنٹ کرائم سیل نے تاوان کیلئے اغوا کیے جانے والے 9 سالہ عبداللہ کو پہلوان گوٹھ سے بازیاب کرلیا ہے۔

آپریشن کے دوران پولیس نے تین اغوا کاروں کو گرفتار کرلیا اور تاوان کے لیے رابطے میں استعمال ہونے والا موبائل فون بھی قبضے میں لے لیا۔

پولیس کے مطابق 9 سالہ عبداللہ کو 13 ستمبر کو سرجانی ٹاؤن  سے اغوا کیا گیا تھا، پولیس نے اسی دن نامعلوم مجرموں کے خلاف مقدمہ (نمبر 1438/2022) درج کیا تھا۔

یہ بھی پڑھیں:

سندھ میں غیرت کے نام پر قتل کے رجحان میں اضافہ

کراچی پولیس کے اینٹی وائلنٹ کرائم سیل کے ایس ایس پی امجد حیات کے مطابق اغوا کاروں نے 14 ستمبر کو 25 لاکھ روپے تاوان کا مطالبہ کیا، تاہم 15 ستمبر کو انہوں نے یہ مطالبہ بڑھا کر 30 لاکھ روپے کردیا۔

کراچی پولیس کی اینٹی وائلنٹ کرائم سیل نے تکنیکی اور سائبر وسائل کی مدد سے اغوا برائے تاوان میں ملوث ملزمان کو تین دن کے اندر گرفتار کرکے مغوی کو بحفاظت بازیاب کرالیا۔ پولیس ملزمان سے مزید تفتیش کررہی ہے۔

علاوہ ازیں پولیس نے گزشتہ روز نوشہرو سے 15 سالہ لڑکے کو بازیاب کرایا۔ لڑکے کو 2021 میں شیر شاہ سے اغوا کیا گیا تھا، 15 سالہ لڑکے کے والدین نے بچے کی بازیابی کے لیے سندھ ہائی کورٹ میں کیس بھی دائر کیا تھا۔