بولان کی تحصیل مچھ میں بم دھماکہ، ایف سی اہلکار زخمی ہوگیا

کوئٹہ: بولان کی تحصیل مچھ میں بم دھماکے کے نتیجے میں فرنٹیئر کانسٹیبلری (ایف سی) کا اہلکار زخمی ہوگیا ہے جسے ہسپتال منتقل کردیا گیا۔

تفصیلات کے مطابق بم دھماکہ مچھ کے نواحی علاقے مارگٹ میں ہوا جس کے نتیجے میں ایف سی اہلکار عصمت اللہ شدید زخمی ہو گئے۔

یہ بھی پڑھیں:

سوات میں بم دھماکہ، امن کمیٹی کے رکن سمیت 5 افراد جاں بحق

واقعے کی اطلاع ملتے ہی پولیس اور ریسکیو اہلکار جائے وقوعہ پر پہنچے اور زخمی عصمت اللہ کو ریسکیو کیا۔ 

ایف سی اہلکار کو ہیلی کاپٹر کے ذریعے سی ایم ایچ کوئٹہ منتقل کیا گیا ہے جہاں انہیں طبی امداد دی جارہی ہے۔ حالت تشویشناک بتائی جاتی ہے۔

خیال رہے کہ اس سے قبل  سوات میں بم دھماکہ ہوا جس کے نتیجے میں  امن کمیٹی کے رکن سمیت 5 افراد جاں بحق ہو گئے۔ ڈی پی او زاہد مروت کی طرف سے اموات کی تصدیق کردی گئی۔

دھماکہ خیبر پختونخوا میں سوات کے علاقے برہ بانڈئی میں ہوا، امن کمیٹی کے جاں بحق رکن کا نام ادریس خان بتایا گیا۔

آج سے 2 روز قبل ہونے والے دھماکے میں 2 پولیس اہلکار بھی جاں بحق ہوئے جب کہ بعض افراد کے زخمی ہونے کی بھی اطلاعات سامنے آئیں۔ امدادی سرگرمیاں شروع کردی گئیں۔