جنسی زیادتی کیس، ضمانت کی درخواست خارج ہونے پر ملزم عدالت سے فرار ہوگیا

عدالت نے جنسی زیادتی کیس کے ملزم کی عبوری ضمانت کی درخواست مسترد کردی، درخواست خارج ہونے پر ملزم عدالت سے فرار ہوگیا جس کی تلاش جاری ہے۔

تفصیلات کے مطابق ملزم منیب عاصم نے یتیم لڑکی سے زیادتی کی۔ ملزم کے وکیل کا دلائل دیتے ہوئے کہنا تھا کہ درج کیا گیا مقدمہ جھوٹا ہے، عدالت میرے مؤکل کی ضمانت منظور کرے تاہم استغاثہ کے وکیل نے واضح کیا کہ ملزم کا ڈی این اے نہیں ہوا۔

یہ بھی پڑھیں:

 چوری کی وارداتوں میں ملوث گینگ کا سرغنہ ساتھی سمیت گرفتار

یتیم لڑکی مدعیہ نور بخت کے وکیل نے کہا کہ تفتیش کے دوران ملزم گنہگار ثابت ہوا۔ اس نے شادی کا جھانسہ دے کر میری مؤکلہ سے اسلحے کے زور پر زیادتی کی، ویڈیوز بنائیں اور 2 سال سے بلیک میلنگ میں ملوث ہے۔ متاثرہ لڑکی اور اہلِ خانہ کو دھمکایا جارہا ہے۔

متاثرہ لڑکی کے وکیل نے کہا کہ ملزم اور اس کے ساتھی کہتے ہیں کہ مقدمہ واپس لے لو، ورنہ جان سے ماردیں گے۔ پولیس بھی ملزم کی پشت پناہی میں ملوث ہے۔ ملزم نے سیشن عدالت میں ضمانت کیلئے 4وکیل تبدیل کیے تھے اور پھر پولیس کی ملی بھگت سے فرار ہوا۔

متاثرہ لڑکی نے واضح کیا کہ موقعے پر موجود اے ایس آئی نے ملزم کی گرفتاری کی بجائے فرار ہونے کی مہلت دی۔ پولیس پہلے دن سے ہی ملزم کی پشت پناہی کر رہی ہے۔ وکیل نے عدالت سے ضمانت خارج کرنے کی درخواست کی۔ 

وکیل نے کہا کہ ملزم سے رعایت نہ برتی جائے۔ 3 ماہ سے مسلسل عبوری ضمانت دی جارہی ہے۔ بعد ازاں عدالت نے ملزم کی عبوری ضمانت خارج کردی، جس کے بعد ملزم پولیس کی مبینہ ملی بھگت سے عدالت سے فرار ہونے میں کامیاب ہوگیا۔