سیلاب سے تباہی، ترکیہ کی 90ہزار مساجد میں پاکستان کیلئے دعا آج ہوگی۔احسن اقبال

اسلام آباد: وفاقی وزیرِ منصوبہ بندی احسن اقبال نے کہا ہے کہ ترک صدر نے پاکستان سے یکجہتی کیلئے وفد کو بھیجا۔ ترکیہ کی 90 ہزار مساجد میں آج پاکستان کیلئے دُعا کی جائے گی۔

سماجی رابطے کی ویب سائٹ ٹوئٹر پر اپنے پیغام میں وفاقی وزیر احسن اقبال نے کہا کہ ترک صدر رجب طیب اردگان نے ترک وزیرِ داخلہ اور وزیرِ ماحولیات کی قیادت میں پاکستان سے اظہارِ یکجہتی کیلئے اعلیٰ سطحی وفد پاکستان بھیجا۔

یہ بھی پڑھیں:

خیبرپختونخوا کے سیلاب زدہ علاقوں میں بجلی بحال کر دی گئی،خرم دستگیر 

ٹوئٹر پیغام میں وزیرِ منصوبہ بندی نے کہا کہ ترکیہ سے طیاروں اور ریل کے ذریعے امدادی سامان آرہا ہے اور ترک وزیرِ داخلہ نے بتایا کہ آج 90 ہزار مساجد میں جمعہ کی نماز کے بعد پاکستان کیلئے دُعا ہوگی۔ 

ترکی کے صدر طیب اردگان نے ترکی وزیر داخلہ اور وزیر ماحولیات کی قیادت میں پاکستان سے یکجہتی کے لئے اعلی سظحی وفد پاکستان بھیجا ہے۔ طیاروں اور ریل کے ذریعہ امدادی سامان آ رہا ہے اور ترک وزیر داخلہ نے بتایا کہ آج 90,000 مساجد میں جمعہ کی نماز کے بعد پاکستان کے لئے دعا ہو گی۔ pic.twitter.com/f5z4O42bni

— Ahsan Iqbal (@betterpakistan) September 2, 2022

ترکیہ کے وزیرِ داخلہ اور وزیرِ ماحولیات 15 رکنی وفد کے ہمراہ پاکستان پہنچے۔احسن اقبال اور رانا ثناء اللہ سمیت وفاقی وزراء نے ترکیہ سے آنے والے اعلیٰ سطحی وفد اور وزراء کا استقبال کیا اور انہیں پاکستان آمد پر خوش آمدید کہا۔

ترک وزیرِ ماحولیات کا کہنا ہے کہ پاکستان اور ترکیہ گہرے دوست ہیں۔ سیلاب سے متاثرہ مشکل وقت میں ہم پاکستان کے غم میں برابر کے شریک ہیں۔ انہوں نے دونوں ممالک کے مابین تعلقات کو فروغ دینے کے عزم کا اظہار کیا۔

پاکستان کے وفاقی وزیرِ داخلہ رانا ثناء اللہ کا کہنا تھا کہ مشکل گھڑی  میں ساتھ دینے پر ترکیہ کے صدر رجب طیب اردگان کا شکریہ ادا کرتے ہیں۔ احسن اقبال نے ترکیہ سے آنے والی امداد پر ترک قیادت کا شکریہ ادا کیا۔

سیلاب سے نقصانات میں اضافہ

دوسری جانب سیلاب سے ہونے والی تباہ کاریاں جاری ہیں۔ پاکستان بھر میں سیلاب کے باعث معیشت کو 2000ارب سے زائد کا نقصان پہنچا۔ سیلابی ریلوں نے سندھ، بلوچستان اور خیبرپختونخوا کے علاوہ جنوبی پنجاب میں بھی تباہی مچا دی۔

اس وقت ملک کا 17فیصد علاقہ بارشوں اور سیلاب کے باعث زیرِ آب ہے۔ سیلاب کے دوران 1200 سے زائد افراد جاں بحق جبکہ 3000 سے زائد زخمی ہوئے۔ سندھ میں 90 فیصد جبکہ ملک بھر میں 45فیصد فصلیں تباہ ہوگئیں۔