پیگاسس کا استعمال اور بدعنوانی، بھارتی وزیر اعظم کیخلاف امریکا میں مقدمہ دائر

واشنگٹن: بھارتی نژاد امریکی ڈاکٹر لوکیش ویورو نے جاسوسی کے سافٹ وئیر پیگاسس کے غیر قانونی استعمال اور بدعنوانی سمیت دیگر الزامات کے تحت بھارتی وزیر اعظم نریندر مودی اور دیگر اہم بھارتی حکام کے خلاف مقدمہ دائر کردیا ہے۔

تفصیلات کے مطابق رچمنڈ میں مقیم معدے کے ڈاکٹر لوکیش ویورو نے بھارتی وزیر اعظم نریندر مودی، آندھرا پردیش کے وزیر اعلیٰ جگن موہن ریڈی اور بزنس ٹائیکون گوتم اڈانی کے خلاف  مقدمہ امریکا میں کولمبین عدالت میں دائر کیا جس پر قانون حرکت میں آگیا۔

یہ بھی پڑھیں:

امریکی انخلا کا ایک سال مکمل، طالبان کا جشن، فوجی پریڈ

مقدمہ دائر ہونے پر عدالت نے تمام رہنماؤں سمیت دیگر فریقین کو بھی نوٹسز جاری کردئیے جو رواں برس کے آغاز میں تمام افراد کو پیش کیے گئے۔ مقدمے میں نامزد دیگر ملزمان میں ورلڈ اکنامک فورم کے بانی و چیئرمین پروفیسر کلاؤس شواب بھی شامل ہیں۔

بھارتی میڈیا کا کہنا ہے کہ آندھرا پردیش سے تعلق رکھنے والے بھارتی نژاد امریکی ڈاکٹر نے وزیر اعظم پر بغیر کوئی دستاویزی ثبوت پیش کیے الزام عائد کیا کہ نریندر مودی دیگر ملزمان کے ساتھ مل کر بدعنوانی میں مصروف ہیں، نقد رقوم کی امریکا منتقلی کی جارہی ہے۔

ڈاکٹر لوکیش نے اپنے مقدمے میں الزام عائد کیا کہ نریندر مودی اور دیگر ملزمان سیاسی مخالفین کے خلاف پیگاسس اسپائی وئیر کا استعمال کرتے ہیں۔ 24 مئی کو دائر کیے گئے مقدمے کے بعد عدالت نے 22 جولائی کو فریقین کو سمن جاری کردئیے۔

بعد ازاں گزشتہ ماہ (اگست) کے آغاز میں ہی ملزمان کو سمن پیش کیے گئے۔ 19 اگست کو درخواست گزار ڈاکٹر ویورو نے عدالت میں سمن جمع کرانے کا ثبوت پیش کردیا۔ امریکی نژاد بھارتی ڈاکٹر کی نریندر مودی اور دیگر ملزمان کے خلاف مقدمہ دائر کرنے کی شکایت 53صفحات پر مشتمل ہے۔