’کناں یاری‘ کے گلوکار: صوبہ بلوچستان میں سیلاب کے باعث بے گھر ہوگئے

پاکستان کا سب سے بڑا لیکن سب سے کم آبادی والا صوبہ بلوچستان ملک میں ہونے والی شدید بارشوں سے سب سے زیادہ متاثر ہوا ہے۔

بلوچستان میں سیلاب اور مسلسل بارشوں کے نتیجے میں مجموعی طور پر 26,567 مکانات کو نقصان پہنچا اور 7,167 مکانات منہدم ہوئے۔ ان دل دہلا دینے والی کہانیوں میں کوک اسٹوڈیو کے مشہور گلوکار وہاب بگٹی کی کہانی بھی ہے جورواں سال کناں یاری سے مشہور ہوئے۔

کناں یاری کوک اسٹوڈیو سیزن 14 کے ابتدائی گانوں میں سے ایک تھا، جو جنوری 2022 میں ریلیز ہوا تھا۔ کناں یاری کی موسیقی معروف گلوکار عبداللہ صدیقی نے ترتیب دی جس میں نغمہ نگار کیفی خلیل اور ریپر ایوا بی نے بھی اپنی آوازوں کا جادو جگایا۔ وہاب علی بگٹی کا تعلق بلوچستان سے ہے جو سیلابی صورتحال کا سامنا کر رہے ہیں۔

حال ہی میں یہ خبر سامنے آئی ہے کہ بلوچستان میں سیلاب کی وجہ سے کوک اسٹوڈیو کے مشہور گلوکار وہاب بگٹی بھی متاثر ہوئےہیں ۔

یہ بھی پڑھیں:

پاکستان میں نیٹ فلکس پر کونسی 7 فلمیں ٹرینڈ کررہی ہیں؟

خیال رہے کہ یہ گزشتہ ہفتے کی بات ہے جب وہاب بگٹی کی شلوار قمیض پہنے، ڈیرہ مراد جمالی میں ایک منہدم دیوار اور زیر آب کھیتوں کے سامنے اپنے اہل خانہ کے ساتھ کھڑی تصویر وائرل ہوئی تھی۔ اس پر کسی کا دھیان نہیں گیا اور خوش قسمتی سے بگٹی کی کہانی سوشل میڈیا کی بدولت کچھ لوگوں کو جھنجھوڑ دینے میں کامیاب ہوئی۔

سوشل میڈیا پر تصویر وائرل ہونے کے بعد بگٹی نے ایک انٹرویو میں کہا کہ ہم ٹھیک ہیں اور اپنے ہی شہر میں محفوظ مقام پر منتقل ہوگئے ہیں اور حالات معمول پر آنے کے بعد واپس چلے جائیں گے۔

انہوں نے یہ بھی بتایا کہ کس طرح طوفانی بارشوں نے اُن کا گھر تباہ کردیا اور انھیں اپنے بچوں سمیت اپنے گاؤں سے دور ایک دوست کے گھر رہنے پر مجبور کیا۔

یاد رہے کہ وہاب بگٹی، جو آٹھ بچوں کے باپ ہیں، نے اپنے موسیقی کے سفر کے بارے میں بات کرتے ہوئے کہا کہ انہیں کوک اسٹوڈیو میں گلوکار زلفی نے متعارف کرایا تھا۔