اسحاق ڈار کو نیا پاکستانی ویزا جاری کردیا گیا، جلد وطن آمد متوقع

لندن: مسلم لیگ ن کے رہنما اور سابق وزیرِ خزانہ اسحاق ڈارکو نیا پاکستانی ویزا جاری کردیا گیا، جلد وطن آمد متوقع ہے۔

تفصیلات کے مطابق مسلم لیگ ن کے قائد میاں نواز شریف نے اسحاق ڈار کو وطن واپس جانے کی اجازت دے دی جبکہ ڈاکٹروں نے بھی اسحاق ڈار کو سفر کرنے کی اجازت دے دی ہے۔

ذرائع کا کہنا ہے کہ سابق وزیرِ خزانہ کو نیا پاسپورٹ لندن میں پاکستانی ہائی کمیشن نے جاری کیا ہے، انہوں نے آن لائن پاسپورٹ کے لئے درخواست دی تھی۔

یہ بھی پڑھیں:

ساؤتھ ایشین گیمز 2023 کی میزبانی پاکستان یا بھارت میں سے کون کرے گا؟ فیصلہ ہوگیا

ذرائع کے مطابق سابق وزیرِ خزانہ آئندہ ماہ وطن واپس آجائیں گے، وطن واپسی پر اسحاق ڈار اپنے خلاف بنائے گئے مقدمات کا سامنا کریں گے، جس کے لیے قانونی ٹیم بھی تشکیل دے دی گئی ہے جبکہ اسحاق ڈار پاکستان پہنچتے ہی سینیٹر کی ذمہ داریاں سنبھالیں گے۔

واضح رہے کہ اسحاق ڈار کو وزارت خزانہ کا قلمدان ملنے کا امکان ہے جس کے لیے انہوں نے جولائی کے پہلے ہفتے میں وطن واپس آنے کا فیصلہ کیا ہے۔

ذرائع کے مطابق سابق وزیرِ خزانہ کو خصوصی طور پر معیشت کے حوالے سے درپیش چیلنجز سے نمٹنے کیلئے بلایا گیا ہے۔

خیال رہے کہ نیب کا نیا قانون پاس ہونے کے بعد اسحاق ڈار کو فائدہ ہوگا اور وہ وطن واپس آتے ساتھ ہی بطور سینیٹر حلف بھی اٹھائیں گے اور پھر انہیں وزارت خزانہ کا قلمدان دیے جانے کا بھی امکان ہے جس کے بعد وہ اپنی معاشی ٹیم بھی بنائیں گے۔