ہم جنس پرستی کا خوف، سعودی عرب نے پاب اٹس پر پابندی لگادی

ریاض: سعودی عرب نے ہم جنس پرستی کے خدشے کے پیشِ نظر بچوں میں مقبول کھلونے پاب اٹس پر پابندی لگادی۔

تفصیلات کے مطابق سعودی عرب نے حال ہی میں ایسی تمام اشیاء کی فروخت پر پابندی لگائی ہے، جن سے ہم جنس پرستی بڑھنے کا خدشہ ہے، اِن میں بچوں کے مختلف کھلونے اور کپڑے بھی شامل ہیں۔

غیر ملکی میڈیا کے مطابق سماجی رابطے کی سائٹ ٹوئٹر پر وزارتِ کامرس نے ایک ویڈیو شیئر کی جس میں دیکھا جاسکتا ہے کہ سعودی حکام نے ہم جنس پرستی کے رنگوں والے بالوں کے کلپس، پاب اٹس، ٹی شرٹس، کیپ اور پینسل کیس سمیت متعدد کھلونے اور ٹی شرٹس ضبط کرلیں۔

فرقنا الرقابية تنفذ جولات على منافذ البيع وتضبط وتصادر منتجات تتضمن رموز ودلالات تدعو للشذوذ وتنافي الفطرة السّوية، وتوقع الجزاءات النظامية على المنشآت المخالفة. pic.twitter.com/XyeNvYmOvl

— وزارة التجارة (@MCgovSA) June 14, 2022

سعودی وزارتِ کامرس کے اہلکار کا کہنا ہے کہ یہ اشیاء اسلامی نظریے اور معاشرتی اقدار کے منافی ہیں اور اِن کے ذریعے ہم جنس پرست رنگوں کو فروغ دینے کی کوشش کی جارہی ہے۔

یہ بھی پڑھیں:

عالیہ بھٹ اور رنبیر کپور کے گھر خوشخبری، جلد ننھے مہمان کی آمد متوقع

انہوں نے دکانداروں کو تنبیہ کی کہ ایسی چیزیں فروخت کرنے والوں پر بھاری جرمانہ عائد کیا جائے گا۔

قبل ازیں گزشتہ سال دسمبر میں قطری حکام نے قوسِ قزح کے رنگوں والے کھلونے دکانوں سے ضبط کیے تھے اور حکام کہنا تھا کہ ان پر اسلامی اقدار کے منافی نعرے درج تھے۔ واضح رہے کہ سعودی عرب میں ہم جنس پرستوں کے تعلقات پر سخت ممانعت ہے۔

معلوم رہے کہ سعودی عرب کے اس اقدام پرغیرمسلم ممالک کی جانب سے سعودی عرب کو شدید تنقید کا نشانہ بنایا جارہا ہے۔