انٹربینک مارکیٹ، ڈالر کی بلند پرواز جاری، 212 روپے کا ہوگیا

کراچی: کاروباری ہفتے کے دوسرے روز بھی ملک میں ڈالر کی اونچی اڑان تاحال جاری ہے انٹربینک میں ڈالر 212 روپے ہوگیا۔

تفصیلات کے مطابق انٹربینک میں روپے کی قدر مزید کم ہوئی گئی، انٹربینک میں ڈالر 2 روپے 40 پیسے کا اضافہ ہوا، جس سے ایک ڈالر 212 روپے کی بلند ترین سطح پر ٹریڈ کررہا ہے۔

دوسری جانب اوپن مارکیٹ میں بھی ڈالر کی قدر میں اضافہ ہوا اور انٹربینک کے مقابلے میں اوپن مارکیٹ میں ڈالر تاریخ کی نئی بلندیوں تک پہنچ گیا اور ایک امریکی ڈالر 213 روپے پر خریدا جارہا اور 215 پر فروخت جاری ہے۔

یہ بھی پڑھیں:

عوام کیلئے ایک اور دھچکا، ریلوے نے بھی کرایوں میں اضافہ کردیا

یاد رہے کہ گزشتہ روز انٹربینک میں ڈالر 1 روپے 21 پیسے کا اضافہ ہوا، جس سے ایک ڈالر 209 روپے 96 پیسے پربند ہوا تھا۔

معلوم رہے کہ خسارے اور زرِمبادلہ کے کم ہوتے ہوئے ذخائر کی وجہ سے پاکستان میں روپے کی قدر میں بھی مسلسل کمی کا سلسلہ جاری ہے اورڈالر میں اضافے کے باعث ملکی قرضوں میں اضافہ ہورہا ہے۔

معاشی ماہرین کے مطابق کرنسی کی قدر میں غیر معمولی اتار چڑھاؤ سے برآمد کنندگان اور درآمد کنندگان کو شدید پریشانی کا سامنا ہے جب کہ بیرونی سرمایہ کاروں پر بھی اسکے منفی اثرات مرتب ہورہے ہیں۔