لیاقت آباد سپر مارکیٹ میں آتشزدگی، 5 دکانیں راکھ کا ڈھیر بن گئیں

شہرِ قائد کے علاقے لیاقت آباد سپر مارکیٹ کی دکانوں میں لگی آگ پر قابو پا لیا گیا ہے۔ آتشزدگی سے 5 دکانیں راکھ کا ڈھیر بن گئیں جبکہ 35 دکانوں کو جزوی طور پر نقصان پہنچا ہے۔

تفصیلات کے مطابق آگ سپر مارکیٹ میں واقع کپڑوں کی دکانوں میں لگی۔ دکانداروں کا کہنا ہے کہ آتشزدگی کے نتیجے میں 35 دکانوں کو نقصان پہنچا جبکہ 5دکانیں مکمل طور پر جل گئیں۔

یہ بھی پڑھیں:

نظارت خانے میں آگ لگنے سے 500 موٹرسائیکل، گاڑیاں جل گئیں

فائر بریگیڈ حکام کا کہنا ہے کہ آتشزدگی پر قابو پا لیا گیا ہے۔ آگ بجھانے کے عمل میں فائر بریگیڈ کی 6 گاڑیوں نے حصہ لیا۔ واقعے کے نتیجے میں اب تک کسی جانی نقصان کی اطلاع نہیں ملی۔ 

خیال رہے کہ اس سے قبل نظارت خانے میں خوفناک آتشزدگی کے باعث 500 سے زائد موٹر سائیکل، 6 بسیں، 2رکشے اور 6 سے 7 گاڑیاں مکمل طور پر جل کر راکھ  ہو گئیں۔ آگ پر قابو پالیا گیا۔ 

گلشنِ اقبال کے عزیز بھٹی پارک کے نزدیک واقع نظارت خانے میں ضبط کی گئی گاڑیاں اور موٹر سائیکلز 9 روز قبل  جل گئیں۔ فائر برگیڈ حکام کا کہنا تھا کہ عزیز بھٹی پارک کے قریب جھاڑیوں میں لگی ہوئی آگ پھیل کر نظارت خانے تک جا پہنچی۔

حکام کے مطابق آگ کو پہلے مرحلے میں پھیلنے سے روکتے ہوئے دوسرے مرحلے میں بجھانے میں کامیابی حاصل کر لی گئی۔ گاڑیوں کے ٹائر جل جانے کے باعث پیدا ہونے والے دھویں سے گلشنِ اقبال میں آلودگی پھیل گئی۔