وزیر اعظم کے خلاف کیسز، حمزہ شہباز بھی طلب، سماعت آج ہوگی

وزیر اعظم اور وزیر اعلیٰ پنجاب کے خلاف کیسز کی سماعت آج ہوگی۔ عدالت نے شہباز شریف اور حمزہ شہباز کو طلب کر لیا۔

تفصیلات کے مطابق لاہور کی احتساب عدالت میں آشیانہ ہاؤسنگ اور رمضان شوگر مل اسکینڈل کیسز کی سماعت ہوگی۔ عدالت نے وزیر اعظم اور وزیر اعلیٰ پنجاب سمیت دیگر ملزمان کو گزشتہ سماعت پر طلب کیا تھا۔

یہ بھی پڑھیں:

خرم دستگیر چار روزہ دورے پر ایران پہنچ گئے

لاہور ڈویلپمنٹ اتھارٹی کے سابق ڈائریکٹر جنرل احد چیمہ اور دیگر ملزمان بھی کیسز کی سماعت کیلئے پیش ہوں گے۔ واضح رہے کہ قومی احتساب بیورو نے ملزمان پر بدعنوانی کے الزامات عائد کیے ہیں۔

خیال رہے کہ اس سے قبل عدالت میں زیرِ سماعت منی لانڈرنگ کیس میں وزیر اعظم شہباز شریف اور وزیر اعلیٰ پنجاب حمزہ شہباز کی حاضری سے استثنیٰ دینے کی درخواست منظور کر لی گئی تھی۔

آج سے 5روز قبل منی لانڈرنگ کیس کی سماعت احتساب عدالت میں ہوئی۔ وزیر اعظم اور وزیر اعلیٰ پنجاب کی قانونی ٹیم نے حاضری سے استثنیٰ کی درخواست میں مؤقف اپنایا کہ دونوں ملزمان مصروفیات کے باعث پیشی سے قاصر ہیں۔

مؤقف کے مطابق وزیر اعظم شہباز شریف فرائض کی انجام دہی اور مصروفیات کے باعث جبکہ حمزہ شہباز 15 جون کو ہونے والے پنجاب اسمبلی کے بجٹ اجلاس کے باعث منی لانڈرنگ کیس کی سماعت کے دوران حاضر نہیں ہوسکے۔