وزیراعظم کے معاونِ خصوصی حنیف عباسی عہدے سے مستعفیٰ

اسلام آباد: وزیراعظم شہباز شریف کے معاونِ خصوصی حنیف عباسی نے عہدے سے استعفیٰ دے دیا۔

تفصیلات کے مطابق ن لیگی رہنما حنیف عباسی نے اپنا استعفیٰ وزیراعظم کو بھجوادیا ہے، انہوں نے کہا کہ کسی عہدے کے بغیر بھی وہ عوام کی خدمت کر سکتے ہیں۔

واضح رہے کہ اسلام آباد ہائیکورٹ نے اُن کی تقرری پر اعتراضات اُٹھاتے ہوئے انھیں مزید کام کرنے سے روک دیا تھا، جس کے بعد حنیف عباسی نے اپنا استعفیٰ وزیراعظم شہباز شریف کو بھجوادیا۔

یہ بھی پڑھیں: پی آئی اے کی خصوصی پرواز 7 جون کو طلبہ کو واپس چین لے کر جائے گی

یاد رہے کہ دو ہفتے پہلے اسلام آباد ہائیکورٹ نے حنیف عباسی کو وزیراعظم کے معاون خصوصی کے طور پر کام سے روک دیا تھا، چیف جسٹس اطہرمن اللہ نے حنیف عباسی کے وکیل کی استدعا مسترد کرتے ہوئے کہا تھا کہ اگرکوئی سزا یافتہ ہو تو وہ پبلک آفس ہولڈ نہیں کرسکتا۔ معاون خصوصی بغیر نوٹیفکیشن بھی وزیراعظم کو مشورہ دے سکتے ہیں۔

ہائیکورٹ کی درخواست کے مطابق حنیف عباسی کے خلاف 2012 میں اینٹی نارکوٹکس فورس نے مقدمہ درج کیا، حنیف عباسی ایفی ڈرین کوٹہ کیس میں سزا یافتہ ہیں، ان کے خلاف ٹرائل کورٹ نے 21 جولائی 2018 کو سزا سنائی۔