ترک سرمایہ کار پاکستان کو اپنا دوسرا گھر سمجھیں، وزیراعظم شہباز شریف

اسلام آباد: وزیراعظم میاں شہباز شریف نے کہا ہے کہ پاکستان مختلف شعبوں میں ترکی کے تجربات سے استفادہ کرنا چاہتا ہے، ترک سرمایہ کار پاکستان کو اپنا دوسرا گھر سمجھیں۔

تفصیلات کے مطابق وزیراعظم شہباز شریف نے ترکی پاکستان بزنس کونسل کی تقریب سے خطاب کرتے ہوئے کہا کہ پاکستان مختلف شعبوں میں ترکی کے تجربات سے استفادہ چاہتا ہے اور ترکی کے ساتھ تجارتی تعلقات کو آگے بڑھانا چاہتے ہیں۔

انہوں نے کہا کہ ٹیکسٹائل کی صنعت میں سرمایہ کاری کے وسیع مواقع موجود ہیں جبکہ تجارت اور عوامی روابط بڑھانے کے مواقع بھی موجود ہیں۔

یہ بھی پڑھیں: الیکشن کیلئے تیار ہیں، تمام فیصلے آئین کے مطابق کرینگے، چیف الیکشن کمشنر

وزیراعظم شہباز شریف نے مزید کہا کہ پاکستان اور ترکی نے ہرمشکل وقت میں ایک دوسرے کا ساتھ دیا، امید ہے کہ دونوں ممالک چیلنجز سے نمٹنے کے لیے ملکر کام کریں گے۔

اُن کا کہنا تھا کہ ترک سرمایہ کاروں کو قدرکی نگاہ سے دیکھتے ہیں اور ترک تاجروں کو پاکستان میں سرمایہ کاری کی دعوت دیتے ہیں۔

قبل ازیں انقرہ میں یونین آف چیمبرز اینڈ کموڈٹی ایکسچینجز ترکی کے صدر رفعت حصارکلیوگلو کی طرف سے اپنے اعزاز میں عشائیہ سے خطاب کرتے ہوئے وزیراعظم نے کہا کہ پاک ترک دو طرفہ تجارتی حجم آئندہ 3 سال میں 5 ارب ڈالر تک لے جانے کیلئے پرعزم ہیں۔

اُن کا کہنا تھا کہ ترک سرمایہ کار پاکستان میں مختلف شعبوں میں سرمایہ کاری کے مواقع سے بھرپور استفادہ کرسکتے ہیں۔

انہوں نے کہا کہ دونوں ممالک کے درمیان باہمی تجارت اور سرمایہ کاری کو فروغ دینے کیلئے تمام رکاوٹوں کو دور کیا جائے گا۔

وزیراعظم شہباز شریف نے ترک سرمایہ کاروں پر زور دیا ہے کہ وہ زراعت، آئی ٹی، ڈیری، ٹیکسٹائل اور دیگر کئی شعبوں جیسے متعدد شعبوں میں اپنا سرمایہ لگائیں۔