نسرین جلیل کو گورنر سندھ بنانے کی سمری صدرِ مملکت کی منظوری سے محروم

اسلام آباد: متحدہ قومی موومنٹ (پاکستان) کی سینئر رہنما نسرین جلیل کو گورنر سندھ بنانے کی وزیر اعظم کی جانب سے صدرِ مملکت کو ارسال کی گئی سمری تاحال منظوری سے محروم ہے۔

تفصیلات کے مطابق مئی کے دوسرے ہفتے کے دوران صدرِ مملکت کو بھیجی گئی سمری تاحال منظوری نہ پا سکی۔ گورنر کی تقرری پنجاب کے بعد سندھ میں بھی معمہ بن کر رہ گئی، دونوں صوبے فی الوقت گورنر سے محروم ہیں۔

یہ بھی پڑھیں:

عالمی اقتصادی فورم کا اجلاس، وزیر خارجہ آج شریک ہونگے 

سابق گورنر عمران اسماعیل کے استعفے کے بعد وزیر اعظم نے متحدہ قومی موومنٹ (پاکستان) سے گورنر کیلئے نام طلب کیے۔ بعد ازاں نسرین جلیل کے نام پر اتفاقِ رائے کے بعد سمری صدرِ مملکت کو ارسال کردی گئی۔

ایوانِ صدر کی جانب سے تاحال سمری پر کوئی ردِ عمل سامنے نہیں آیا۔ وزیر اعظم کا سمری میں کہنا تھا کہ وفاقی حکومت نسرین جلیل کو گورنر سندھ نامزد کرچکی ہے، صدر سے سمری کو منظور کرنے کی درخواست بھی کی گئی۔

سمری بھیجے ہوئے 11 روز سے زائد گزر جانے کے باوجود صدرِ مملکت ڈاکٹر عارف علوی نے آئینی اعتراض عائد نہیں کیا، نہ ہی سمری کو منظور کیا۔ صدرِ مملکت کی تاخیر کے باعث نسرین جلیل تاحال گورنر کے عہدے کا حلف نہیں اٹھا سکیں۔