آئی ایم ایف کا وفد سبسڈیز پر مذاکرات کیلئے آئندہ ماہ پاکستان کا دورہ کرے گا

اسلام آباد: آئی ایم ایف کا وفد مئی میں پاکستان کا دورہ کرنے کیلئے تیار ہے جہاں وفد کے اراکین حکومت کی جانب سے پیٹرول اور بجلی پر دی جانے والی سبسڈی سے متعلق امور پر تبادلہ خیال کریں گے۔

تفصیلات کے مطابق پاکستانی وفد نے آئی ایم ایف کے حکام کے ساتھ کئی ملاقاتیں کی ہیں  جن میں آئی ایم ایف کے ڈپٹی منیجنگ ڈائریکٹر ، ڈائریکٹر مشرق وسطیٰ اور  پاکستانی مشن چیف ناتھن پورٹر شامل تھے ، پاکستانی حکام اور آئی ایم ایف کے عہدیداران نے ساتویں جائزے کو مکمل کرنے کے حوالے سے تبادلہ خیال کیا۔

یہ بھی پڑھیں:

کراچی سمیت ملک بھر میں طویل لوڈ شیڈنگ، شہریوں کی زندگی اجیرن

وفاقی وزیر خزانہ مفتاح اسماعیل نے بین الاقوامی منڈیوں میں تیل کی قیمتوں کے اتار چڑھاؤ سے کمزور افراد کو محفوظ رکھتے ہوئے مالیاتی نظم و ضبط لانے کیلئے  اپنی حکومت کی ترجیحات اور کوششوں پر روشنی ڈالی۔ آئی ایم ایف نے پاکستانی وفد کی حمایت کا اظہار کیا۔مشن چیف ناتھن پورٹر کی قیادت میں آئی ایم ایف کا وفد مئی میں پاکستان کا دورہ کرے گا۔ 

مئی کے دوران گزشتہ پی ٹی آئی حکومت کی جانب سے اعلان کردہ پیٹرول اور بجلی پر سبسڈی سے متعلق امور پر بات چیت کی جائے گی۔ پاکستانی وفد نے ورلڈ بینک کے منیجنگ ڈائریکٹر مسٹر ایکسل وان ٹراٹسنبرگ، نائب صدر ہارٹ وِگ شیفر اور دیگر حکام سے بھی ملاقات کی جس کے دوران جاری پروگرام کے قرضوں پر بات چیت ہوئی۔ 

وزیر خزانہ مفتاح اسماعیل نے ورلڈ بینک کی جانب سے فراہم کردہ مالی اور تکنیکی تعاون پر حکام کا شکریہ ادا کیا۔واضح رہے کہ اس سے قبل وزیر خزانہ مفتاح اسماعیل نے آئی ایم ایف کے سینئر حکام کے ساتھ ملاقاتیں کیں جن کے دوران ایندھن پر دی گئی سبسڈی ختم کرنے سے متعلق بات چیت ہوئی تھی۔