بجلی کا شارٹ فال 3900میگا واٹ رہ گیا، بد ترین لوڈ شیڈنگ پر عوام سراپا احتجاج

ملک بھر میں بد ترین لوڈ شیڈنگ کا سلسلہ جاری ہے، دو روز بجلی کی فراہمی میں تعطل کے باعث شارٹ فال 3900 میگا واٹ رہ گیا تاہم لوڈ شیڈنگ کے دورانیے میں کمی کی بجائے اضافے پر عوام سراپا احتجاج ہیں۔

تفصیلات کے مطابق ملک بھر میں لوڈ شیڈنگ کی طوالت 5 سے 6 گھنٹوں تک جا پہنچی۔ ایندھن کی کمی، تکنیکی مسائل اور شارٹ فال کی شکایت کم ہوگئی تاہم لوڈ شیڈنگ کا سلسلہ نہ تھم سکا۔ ملک بھر میں پن بجلی کی پیداوار 17600 میگا واٹ جبکہ طلب 21500میگا واٹ ہے۔ سرکاری تھرمل بجلی گھر 2500میگا واٹ بجلی کی پیداوار دے رہے ہیں۔

یہ بھی پڑھیں:

کراچی میں رمضان المبارک کے دوران گھنٹوں لوڈ شیڈنگ بد ترین ظلم ہے۔قاری عثمان

نجی شعبے کے بجلی گھر بھی ملک بھر کو 14000 میگا واٹ بجلی مہیا کر رہے ہیں تاہم کراچی سمیت ملک کے مختلف شہروں میں لوڈ شیڈنگ کی جارہی ہے۔ کراچی میں لوڈ شیڈنگ 8 سے 15 گھنٹوں تک جا پہنچی جس پر کے الیکٹرک کے خلاف احتجاج جاری ہے۔ شہریوں کا کہنا ہے کہ کے الیکٹرک کو رمضان المبارک کے دوران بھی عوام پر ترس نہیں آیا۔ 

خیال رہے کہ اس سے قبل  جمعیت علمائے اسلام ضلع کیماڑی کے امیر قاری محمد عثمان نے کہا کہ رمضان المبارک کے دوران شہر بھر میں گھنٹوں لوڈ شیڈنگ بد ترین ظلم ہے۔ کے الیکٹرک انتظامیہ شدید گرمی میں شہریوں پر مزید آگ برسا رہی ہے۔

 امیر جمعیت علمائے اسلام کیماڑی قاری محمد عثمان نے اپنے ایک بیان میں کہا کہ شدید گرمی میں کراچی کے مختلف علاقوں میں 8 سے 15 گھنٹوں کی طویل لوڈ شیڈنگ کے الیکٹرک کی بدعنوانی کا منہ بولتا ثبوت ہے۔ صوبائی حکومت کے الیکٹرک کا قبلہ درست کرے ورنہ مہنگائی کے ڈسے ہوئے شہری کے الیکٹرک کے دفاتر کا گھیراؤ کریں گے۔